Մեծ թվով ոստիկաններ քաղաքապետարանում, վատացավ Մարտին Վարդազարյանը (տեսանյութ)
Երեւանի քաղաքապետարանում ծեծկռտուքի պատճառով ընդհատված նիստից հետո, մեծ թվով ոստիկաններ եւ բժիշկներ հրավիրվեցին, սակայն դահլիճ լրագրողների մուտքն արգելված էր: Ավելի ուշ, «Երկիր Ծիրանի» խմբակցության ղեկավար Զարուհի Փոստանջյանը հայտնեց, որ բժիշկները ասել են, որ փակ համարից իրենց մոտ կանչ է գրանցվել եւ իրենք ժամանել են: Նրանք , ըստ Զարուհի Փոստանջյանի՝ ժամանել էին հոգեբուժարանից: Հիշեցնենք, որ այսօր «Երկիր ծիրանի» խմբակցության անդամները Նուբարաշենի կոյուղաջրերից վերցրած նմուշներ էին բերել նիստի, ինչի արդյունքում ծեծկռտուք եղավ ավագանու ՀՀԿ եւ ԵԾ անդամների միջեւ: Մոտ 40 րոպե ընդմիջումից հետո, ավագանու նիստը շարունակվեց: Փոխքաղաքապետ Կամո Արեյանը նշեց, որ ոմանց ցնորամիտ պահվածքի պատճառով մտադիր չեն ավագանու նիստն ընդհատել եւ սառնասրտորեն այն շարունակելու են եւ կոչ արեց խստացնել անվտանգությունը: Երեւանի քաղաքապետ Տարոն Մարգարյանն էլ ասաց, որ այսուհետ Երեւանի քաղաքապետարանի մուտքը եւ անվտանգությունը խստացվելու է, որպեսզի վտանգավոր իրեր եւ առարկաներ չկարողանան ներս մտցնել: Միջադեպից հետո վատացել է ավագանու անդամ Մարտին Վարդազարյանի ինքնազգացողությունը, նա տեղափոխվել է հիվանդանոց:
