Ամենակարևոր խնդիրը լուծված չէ՝ աղքատության կրճատումը (տեսանյութ)
Հանրապետական պատգամավոր Գագիկ Մելիքյանը գոհ է տնտեսական ոլորտում իշխանության գործողություններից, միայն թե նրանց խանգարում են աշխարհում տեղի ունեցող գլոբալ իրադարձությունները եւ մեր երկրի շրջափակված լինելը։ «Այն ծրագրերը, որ մենք դրել ենք մեր առջեւ՝ իրականացվում են: Մենք 2017-ին ապահովեցինք 7,7 տոկոս ՀՆԱ-ի աճ եւ 12 տոկոսից ավել տնտեսական ակտիվության աճ»: Նման լավատեսությունը չի կիսում անգամ Հանրապետականի կոալիցիոն գործընկերը։ «Առաջին խնդիրն այն է, որ մենք չունեցանք ներառական աճ: Այն տնտեսական աճից տարբերվում է, իրենից ներկայացնում է որակական ցուցանիշների համախումբ, այսինքն` աղքատության կրճատում, եկամուտների բևեռականության նվազում, արտադրողականության աճ, կյանքի տևողության աճ, որոնք մեր տնտեսության համար կապահովեն ներառական աճ»: Մեր երկրում ամենակարևոր խնդիրը լուծված չէ, որից հետո միայն կարող ենք խոսել տնտեսական աճի ու առաջընթացի մասին։ «Ներկայումս պետք է լուծենք աղքատության խնդիրը: Աղքատության կրճատումը հանգեցնելու է մասնավոր սեկտորում կապիտալի աճին»: Կառավարության ծրագրերը պետք է լինեն իրատեսական, վերացական ծրագրերը թույլ չեն տալիս ճիշտ գործողությունների պլան մշակել: «Զարգացման ծրագիրը, որտեղ գրված է, թե տարեկան պետք է 2 տոկոսով աղքատությունը նվազեր, ապա մենք հիմա 8 տոկոսով պետք է աղքատությունը նվազեցրած լինեինք»: Ապրիլից, երբ արդեն ամբողջովին գործի նոր Սահմանադրությունը, վարչապետն ու նրա կաբինետը կրելու են երկրի կառավարման ամբողջ պատասխանատվությունը։ «Չգրված օրենքներով մենք արդեն հստակ գիտենք, թե ինչպիսի փոփոխություններ են սպասվում: Արտաքին դիվանագիտության մեծ հաջողությունները և նրբանկատ քայլերը թույլ տվեցին ԵԱՏՄ-ԵՄ բալանսավորված քաղաքականություն վարել: Հաշվի առնելով որոշ շշուկներ՝ ենթադրում եմ, որ վարչապետի պաշտոնը կստանձնի ներկայիս նախագահը»: Ինչ վերաբերում է ներկայիս վարչապետին, ապա Մակարյանը կարծում է, որ Կարեն Կարապետյանը կլինի փոխվարչապետերից մեկը։