ՀԱՕԿ-ում մինի ֆուտբոլը շփոթել են մեծ ֆուտբոլի հետ
ՀՀ սպորտի եւ երտասարդության հարցերի նախարարության պաշտոնական կայքն այսօր լուր է տարածել, որ Հայաստանի ազգային օլիմպիական կոմիտեի նախագահ Գագիկ Ծառուկյանի մասնավոր ներդրումների հաշվին Երեւանի օլիմպիական հերթափոխի պետական մարզական քոլեջի Ծաղկաձորի մասնաճյուղի բազայի վրա կառուցվելու է նոր եւ ժամանակակից մարզահամալիր: Ինչպես հայտնում է աղբյուրը, ՀՀ սպորտի եւ երիտասարդության հարցերի նախարար Հրաչյա Ռոստոմյանն համալիրի նախագիծն արդեն քննարկել է մարզաձեւերի մասնագետների հետ: Ըստ դրա, մարզահամալիրը ունենալու է միջազգային չափորոշիչներին համապատասխանող մարզադահլիճներ, ֆուտբոլի խաղադաշտ, աթլետիկայի համալիր, առանձին վազքուղի, հրաձգարան, լողավազան, հյուրանոցային երկու մասնաշենք: Սակայն ծանոթանալով Ծաղկաձորի օլիմպիական քոլեջի նոր նախագծի հետ, դրանում պարզ երեւում է, որ ֆուտբոլի խաղադաշտ չի լինելու: Դա ընդամենը մինի ֆուտբոլի (50x25 մ) խաղահրապարակ է: Հավելենք, որ նախնական հաշվարկներով մարզահամալիրի կառուցման ընդհանուր արժեքը կկազմի շուրջ 30 միլիարդ դրամ: