Քաղաքացիների մեծ մասը չի ճանաչում Արմեն Սարգսյանին (տեսանյութ)
Հանրապետականը առաջադրեց Հայաստանի չորրորդ նախագահի թեկնածուին։ Նա Մեծ Բրիտանիայի եւ Հյուսիսային Իռլանդիայի Թագավորությունում ՀՀ արտակարգ եւ լիազոր դեսպան Արմեն Սարգսյանն է, որը շատ կարճ՝ 1996թ. դեկտեմբերից մինչև 1997թ. փետրվար, զբաղեցրել է նաեւ վարչապետի պաշտոնը։ Արմեն Սարգսյանի թեկնածության վերաբերյալ համացանցում գնահատականները տարբեր են, ածականների մեջ գերիշխող է հարուստ, խելացի եւ փորձառու բնորոշումները։ Բայց չեն մոռանում հիշեցնել, որ նրա անվան հետ է կապվում Ամուլսարի վիճահարույց ծրագիրը։ ՀՀ նախագահին կընտրի խորհրդարանը մարտի սկզբին։ Նախագահը պետք է ստանա առնվազն 79 կողմ ձայն: Հանրապետականը ՀՅ Դաշնակցության հետ միասին ունի 65 պատգամավոր, այսինքն՝ իշխող կոալիցիային անհրաժեշտ է ևս 14 ձայն: Ելքն արդեն իսկ ներկայացրել է իր թեկնածուին՝ ի դեմս Արտակ Զեյնալյանի։ Այսինքն՝ հանրապետականն ակնկալելու է աջակցություն հատկապես «Ծառուկյան» խմբակցությունից։ Վերջինս առայժմ դիրքորոշում չի հայտնել Արմեն Սարգսյանի վերաբերյալ: Իսկ ինչպիսի՞ն է քաղաքացիների կարծիքը Արմեն Սարգսյանի վերաբերյալ, արդյո՞ք մեր համաքաղաքացիները ճանաչում են հաջորդ նախագահի թեկնածուին: Մանրամասները՝ տեսանյութում
