«Սասնա ծռեր»-ի բոյկոտի պատճառով նիստը հետաձգվեց (տեսանյութ)
Դատական նիստի հենց սկզբում «Սասնա ծռեր » խմբի անդամները ցանկացան լքել դահլիճը` ի աջակցություն իրենց հացադուլավոր ընկերների։ «Ինչն է պատճառը, մի հատ կարող եք ասել, կարող է նրանց մի քանի ժամվա մեջ կամ հաջորդ օրը տեղափոխում են»,- փորձեց նրանց հեռանալը կանխել Էրեբունի եւ Նուբարաշեն վարչական շրջանների ընդհանուր իրավասության դատարանի դատավոր Արտուշ Գաբրիելյանը: Անջատված մասով անցնող՝ Սասնա ծռեր խմբի անդամ Արմեն Բիլյանն արդեն 24, իսկ Սմբատ Բարսեղյանը 22 օր է գտնվում է հացադուլի մեջ: Նրանք պահանջում են իրենց տեղափոխել «Արմավիր» ՔԿՀ: Պաշտպաններից Մուշեղ Շուշանյանը հայտարարեց, որ Սմբատ Բարսեղյանի եւ Արմեն Բիլյանի նկատմամբ իրականացվում է խոշտանգում «Դանդաղ կերպով, ես պատասխանատու ձեւով հայտարարում եմ, որ սպանում են, որովհետեւ ամեն պահի անդառնալի պրոցեսներ կարող են տեղի ունենալ նրանց օրգանիզմում : Մի անգամ այդպիսի փորձ արեցին Հաց բերող Արթուր Սարգսյանի հետ, հիմա նույնն են անում»: Չնայած Էրեբունի եւ Նուբարաշեն վարչական շրջանների ընդհանուր իրավասության դատարանի դատավոր Արտուշ Գաբրիելյանի նախազգուշացումներին՝ «Սասնա ծռեր»-ը չփոխեցին իրենց մտադրությունը։ « Հիմա, եթե լքեք նիստերի դահլիճը, այդ դեպքում պարտավոր եմ ձեր նկատմամբ կիրառել սանկցիա»: «Սասնա ծռեր» խմբի անդամներից Աշոտ Պետրոսյանը հայտարարեց, որ ի աջակցություն իրենց ընկերների՝ դիտավորյալ լքում ենք նիստերի դահլիճը: Մինչ հեռանալը, նրանք հայտարարեցին, որ հրաժարվում են նաեւ իրենց պաշտպանների ծառայություններից: Դատավորը որոշեց նրանց 2 ժամով հեռացնել նիստից եւ հետաձգեց դատը: Արտուշ Գաբրիելյանը նաեւ որոշել է դիմել Հանրային պաշտպանի գրասենյակ՝ Սասնա ծռերին հանրային պաշտպանով ապահովվելու համար: