Միայնակ գայլի առողջական վիճակը վատացել է (տեսանյութ)
Արդեն 10 օր հացադուլի մեջ գտնվող «Սասնա ծռեր» խմբի անդամ Արայիկ Խանդոյանը առողջկան վիճակը վատացել է։ «Գլխացավեր, սրտխառնոց, ոտքերի, ողնաշարի ցավ ունի»,- ասում է նրա պաշտպան Արա Ղարագյոզյանը: Ազատամարտիկների շրջանում «Միայնակ Գայլ» անունով հայտնի Արայիկ Խանդոյանը «Նուբարաշեն» ՔԿՀ-ի պատժախուց տեղափոխվելուց հետո դեկտեմբերի 29-ին հացադուլ էր հայտարարել: Նա պահանջում է շուտափույթ կերպով բավարարել Արմեն Բիլյանի և Սմբատ Բարսեղյանի պահանջները և նրանց տեղափոխել «Արմավիր» ՔԿՀ: Արմեն Բիլյանը հացադուլի մեջ է դեկտեմբերի 19-ից, իսկ Սմբատ Բարսեղյանը՝ դեկտեմբերի 21-ից: Պաշտպանն այսօր տեսակցել է Արայիկ Խանդոյանին: Վերջինս պաշտպանին ասել է, որ պատժախցում շատ ցուրտ է: «Տեսակցության ժամանակ գլխարկով էր, երկու սվիտեր, բաճկոն, ակնհայտ երեւում է, որ այնտեղ սառնամանիք է եղել եւ ակնհայտ անմարդկային պայմաններ են»,- ավելացնում է պաշտպանը: Արա Ղարագյոզյանը նաեւ անմարդկային վերաբերմունք է համարում հացադուլ հայտարարած անձին պատժախուց տեղափոխելը: «Անձը, երբ հայտարարում է հացադուլ, պետք է համապատասխան պայմաններ ստեղծեն, հացադուլավորների համար նախատեսված խցում մնալու համար»: Արայիկ Խանդոյանի խցում իրականացվել է խուզարկություն, հայտնաբերվել է երկու հեռախոս և ինքնաշեն ալկոհոլային խմիչք։ «Հեռախոսների պահով Արայիկ Խանդոյանը ընդունել է, իսկ ալկոհոլային խմիչքը իրականությանը չի համապատասխանում եւ դա կարելի է ասել՝ հերյուրանք է»: Պաշտպանը հավելում է՝ հեռախոս բոլոր կալանավորված անձանց մոտ էլ կա եւ դա գաղտնիք չէ. «Ում մոտից ուզում են հայտնաբերում են, ում մոտից չեն ուզում չեն հայտնաբերում: Շատ են դեպքերը, երբ հեռախոս հայտնաբերել են, բայց պատժախուց չեն տեղափոխել: Դա պարզապես պլանավորված է, որ աշխատանքային վերջին օրը պետք է պատժախուց տեղափոխեին եւ տարվա սկզբի առաջին աշխատանքային օրը նրա պատժախցի ժամկետը պետք է լրանար, որ պետական մարմիններին դիմելն անիմաստ դառնար»,- ավելացնում է պաշտպանը: Այսօր լրանում է Արայիկ Խանդոյանի պատժախցում գտնվելու ժամկետը: Սակայն նա մտադիր չէ դադարեցնել հացադուլը: ՔԿՀ վարչության հանրային կապերի հետ բաժնից փոխանցեցին, որ Սասնա ծռերի 3 անդամները Արայիկ Խանդոյանը, Արմեն Բիլյանը եւ Սմբատ Բարսեղյանը շարունակում են հացադուլը եւ առայժմ նրանց վիճակը գնահատվում է բավարար: