«Եթե բանակցային գործընթացում ուզում ենք բեկում, սահմաններին պետք է հանդարտություն լինի» (տեսանյութ)
Հանրապետական խմբակցության անդամ, «Եվրոպական ինտեգրացիա» ՀԿ նախագահ Կարեն Բեքարյանը այսօր ասուլիսում ամփոփեց տարին՝ խոսելով Ղարաբաղի հակամարտության կարգավորման գործընթացի մասին։ «Ակնկալել արդյունք քաղաքական գործընթացում, երբ շարունակվում են կրակոցները, և լինում են զոհեր, վիրավորներ թե զինվորականության, թե խաղաղ բնակչության մեջ, դա որևէ կերպ տրամաբանական չէ։ Եթե մենք ուզում ենք իրական բեկում բանակցային գործընթացում, սահմաններին պետք է լինի հանդարտություն։ Եվ պատահական չէ, որ Վիեննայի և Սանկտ-Պետերբուրգի, ապա նաև Ժնևի պայմանավորվածությունների դաշտում սա դիտվում է առաջնահերթ»,-նշեց նա։ 17 թվականին սահմանին եղել են զոհեր, վիրավորներ, լիցքաթափման փոխարեն եղել է սրացում։ «Լիցքաթափման էլեմենտներ կարելի է դիտարկել Ժնևյան հանդիպումից հետո»,-ասաց նա։ Տարվա ընթացքում համանախագահությունը աշխատել է բավականին ակտիվ. «Ունեցել ենք համանախագահների 10-ից ավելի հաղորդագրություն-հայտարարություն: Այսինքն՝ ամսական միջինը կազմել է 1 հայտարարություն, դրան գումարած նաև հայտարարությունները, որոնք հաջորդել կամ նախորդել են ինչ-որ իրադարձության՝ արտգործնախարարների հանդիպում, համանախագահների տարածաշրջանային այց, նախագահների հանդիպում և այլն»։ Ըստ պարոն Բեքարյանի՝ հայտարարություններից կարելի է ընդհանրացնել հետևյալը. հանդիպումների ժամանակ փորձել են լուծել մի կողմից վստահության միջոցների և սահմաններում լարվածությունը թուլացնելու խնդիրները, մյուս կողմից՝ բանակցային գործընթացը տեղից շարժելու խնդիրը: Բանախոսը կարևորեց նաև տարածաշրջանային և միջազգային ֆոնը։ «Տարածաշրջանն իր մեջ պարունակում է թեժ գոտիներ. կա իրական առաջընթաց Իրաքում և Սիրիայում, բայց պրոցեսը ավարտված և լիարժեք արմատախիլ արված չէ։ Բնականաբար սա իր որոշակի լարվածությունն է փոխանցում, քանի որ մենք շատ մոտ ենք գտնվում աշխարհագրորեն, մյուս գործոնը Իրան-Միացյալ Նահանգներ հակազդեցության նոր փուլն է։ Շարունակվել է Թուրքիայի և Ադրբեջանի քաղաքականությունը՝ փորձելու Հայաստանը մեկուսացնելու տնտեսական ծրագրերից և պրոյեկտներից»,- ասում է նա։