Լավրով. ՌԴ-ն ԵԱՀԿ շրջանակում կնպաստի ղարաբաղյան հակամարտության կարգավորմանը

Ռուսաստանը կշարունակի նպաստել ղարաբաղյան հակամարտության կարգավորմանը: Այս մասին հայտարարել է ՌԴ ԱԳ նախարար Սերգեյ Լավրովը՝ ելույթ ունենալով Վիեննայում անցկացվող ԵԱՀԿ ԱԳ նախարարների խորհրդի 24-րդ նիստում:

«Լեռնային Ղարաբաղի հարցում Ռուսաստանը, նաեւ որպես ԵԱՀԿ Մինսկի խմբի համանախագահ, այսուհետեւ եւս կնպաստի կողմերի փոխընդունելի հանգուցալուծումների որոնմանը՝ այն սկզբունքներին համապատասխան, որոնք բազմիցս արժանացել են Ռուսաստանի, ԱՄՆ եւ Ֆրանսիայի նախագահների հավանությանը»,- նշել է Լավրովը:

———–

ԱՄՆ-ը աջակցում է ԵԱՀԿ Մինսկի խմբի ջանքերին՝ լուծում գտնելու Լեռնային Ղարաբաղի հակամարտությանը:

Այս մասին Վիեննայում ԵԱՀԿ նախարարների խորհրդի նիստին հայտարարել է ԱՄՆ պետքարտուղար Ռեքս Թիլերսոնը:

«Մենք աջակցում ենք Մինսկի խմբի ջանքերին՝ ուղղված Լեռնային Ղարաբաղի հակամարտությանը լուծումներ գտնելուն:

Մենք գոհ ենք հոկտեմբերին Հայաստանի և Ադրբեջանի նախագահերի հանդիպման արդյունքում նրանց ստանձնած հանձնառություններից՝ կապված մասնավորապես, բանակցային գործընթացն ակտիվացնելու, շփման գծում լարվածությունը թուլացնելու հետ: Առանցքային առաջընթացի հնարավոր է հասնել միայն քաղաքական կամքի առկայության դեպքում: Մենք ողջունում ենք երեկվա հանդիպման արդյունքում կողմերի որոշումը՝ բանակցել հարցի շուրջ»,- ասել է Թիլերսոնը: 

————–
Իսկ ԵԱՀԿ խորհրդարանական վեհաժողովի նախագահ Գեորգի Ծերեթելին էլ իր մտահոգությունն է հայտնել Արցախի հակամարտության շուրջ լարվածության ակտիվացման վերաբերյալ:

Այս մասին Ծերեթելլին ասել է Վիեննայում ԵԱՀԿ նախարարների խորհրդի նիստին: «Որպես ԵԱՀԿ ԽՎ նախագահ՝ ես հավասարապես մտահոգված եմ ԵԱՀԿ տարածությունում բոլոր հակամարտություններով»,- ասել է Ծերեթելլին՝ առանձնացնելով Լեռնային Ղարաբաղի և Ուկրաինայի հակամարտությունները: ԵԱՀԿ ԽՎ նախագահը նաև ափսոսանք է հայտնել, որ վերջին տարիներին տեղերում ԵԱՀԿ մի շարք գրասենյակներ են փակվել, «երբեմն ընդունող երկրի կամքին հակառակ»: