Դատավորի կաշառքի գործով մյուս ամբաստանյալը մանրամասներ է հայտնել (տեսանյութ)
Կաշառք ստանալու մեջ մեղադրվող Իշխան Բարսեղյանի գործով մյուս ամբաստանյալը՝ Էլզա Զաքարյանը, հրաժարվում է պատասխանել նախկին դատավորի եւ նրա պաշտպանների հարցերին: «Իշխան Բարսեղյանը իր որեւէ ցուցմունքով, քայլով, հայտարարությամբ չի ամբաստանել Էլզա Զաքարյանին եւ մեզ համար տարօրինակ է, որ Էլզա Զաքարյանը Բարսեղյանի եւ նրա պաշտպանների հարցերին չէր պատասխանում : Կարծես Բարսեղյանի գործով գործ ունենք երկու մեղադրողների հետ: Մենք չենք կարող պաշտոնապես հայտարարել, որ նա համագործակցում է, բայց հետագայում, երբ կլսեք մեր ճառերը, մենք դրան կանդրադառնանք»,- ասաց պաշտպան Վարդուհի Էլբակյանը: Կաշառքի միջնորդության մեջ մեղադրվող Էլզա Զաքարյանը ընդունեց իրեն առաջադրված մեղադրանքը: Ի տարբերություն նրա՝ Իշխան Բարսեղյանը չի ընդունում իր մեղքը: Ըստ մեղադրանքի՝ Իշխան Բարսեղյանը քաղաքացիական գործով իր լիազորությունների շրջանակում գործողություններ կատարելու համար նրանից միջնորդի միջոցով պահանջել եւ անձամբ ստացել է խոշոր չափերով կաշառք՝ 1000 ԱՄՆ դոլարի չափով: Այսօր Էլզա Զաքարյանը դեպքից մանրամասներ ներկայացրեց. «Երկրորդ անգամ որ բարձրացա, ասեց գործը շատ դժվար է, այնտեղ հակընդդեմ հայցը պետք է վարույթ ընդունվեր կամ հայցադիմումի մեջ պետք է փոփոխվեր»,- պատմեց ամբաստանյալը: Ցուցմունքում Էլզա Զաքարյանը նշել է, որ Իշխան Բարսեղյանը Նորիկ Հակոբյանից հենց նույն օրը 1000 դոլար էր պահանջել՝ տնից վտարելու հարցը լուծելու համար: Նորիկ Հակոբյանը ճարել է այդ գումարը եւ կրկին ցանկացել հանդիպել Էլզա Զաքարյանին. «Ես մերժեցի, ասեցի հարմար չի եւ իմ գալու իմաստը չկա: Ասեցի կզանգեմ Իշխան Բարսեղյանին տեսնեմ ի՞նչ է ասում, էլի երկարատեւ ժամանակ պարոն Բարսեղյանը համոզում էր, որ գումարը Նորիկից ես վերցնեմ եւ իրեն փոխանցեմ 100 դոլարի դիմաց, բնականաբար ես մերժեցի»: Դրանից հետո նոր միայն, ըստ ցուցմունքի, Իշխան Բարսեղյանը Նորիկ Հակոբյանին ասել է որտեղ հանդիպեն: Էլզա Զաքարյանը այսօր դատարանում նաեւ հայտարարեց, որ ակամայից է հայտնվել այդ իրավիճակում: Իշխան Բարսեղյանի պաշտպանի Կարեն Հովհաննիսյանին մեկ հարց էր հետաքրքրում. «Ձեր անձնական ընկալմամբ դուք ո՞ւմ աջակցեցիք, ո՞ւմ օժանդակեցիք՝ Նորիկի՞ն, թե՞ Իշխան Բարսեղյանին 1000 դոլարը ստանալու համար»: Այս հարցին էլ Էլզա Զաքարյանը հրաժարվեց պատասխանել: Դատական հաջորդ նիստին արդեն ցուցմունք կտա Իշխան Բարսեղյանը: