«Մանչեսթր Յունայթեդն» անսպասելի պարտվեց առաջնության նորեկին
Ֆուտբոլի Անգլիայի Պրեմիեր լիգայի 9-րդ տուրում գրանցվեց անակնկալ արդյունք: «Մանչեսթր Յունայթեդը» «Հադերսֆիլդի» հետ արտագնա խաղում չնայած տարածքային մեծ առավելություն ուներ՝ 78 տոկոս մրցակցի 22-ի դիմաց, սակայն բավական անհաջող հանդես եկավ եւ պարտվեց 1:2 հաշվով: Առաջին խաղակեսի միջնամասում տանտերերը հինգ րոպեի ընթացքում երկու գոլ խփեցին եւ շոշափելի առավելություն ստացան: Ընդմիջումից հետո հյուերը չնայած մեկ տոկոսով ավելացրին առավելությունը, սակայն կարողացան ընդամենը կրճատել հաշվի տարբերությունը: Այդպիսով, «Մանչեսթր Յունայթեդը» 1:2 հաշվով անսպասելի պարտվեց առաջնության նորեկին եւ էլ ավելի ետ մնաց առաջնության առաջատար «Մանչեսթր Սիթիից», որն այս տուրում իր հարկի տակ վստահ հաղթեց «Բառնլիին»՝ 3:0: «Մանչեսթր Յունայթեդում» հանդես եկող մեր ֆուտբոլիստ Հենրիխ Մխիթարյանն այս անգամ չէր ընդգրկվել իր թիմի մեկնարկային կազմում: Նա փոխարինման մտավ անմիջապես ընմիջումից հետո, սակայն ոչնչով աչքի չընկավ եւ չկարողացավ օգնել իր թիմին: