Վկան հարցերին չպատասխանեց. «Կմերկանար այն, ինչ նախատեսել էին» (տեսանյութ)
Լիբանանահայ Վիգեն Թաշչյանն անձամբ չի ճանաչել եւ շփումներ չի ունեցել «Հիմնադիր խորհրդարան»-ի ներկայացուցիչներ Ժիրայր Սեֆիլյանի , Գեւորգ Սաֆարյանի հետ: Բայց նախաքննության ընթացքում տված ցուցմունքում նշել էր, որ լրատվամիջոցներով տեղեկացել է «Հիմնադիր խորհրդարանի» նպատակների մասին, եւ այդ ընկալել որպես զինված ընդհարումների եւ անկարգությունների կոչեր: Կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու մեջ մեղադրվող Ներսես Պողոսյանը մեկ հարց ուներ վկա լիբանանահայ Վիգեն Թաշչյանին. «Արծածված բառը կասեք ի՞նչ է նշանակում»: Վկան դա բացատրեց որպես քննարկում: «Ցուցմունքը ինքը չի գրել, հարգելի դատարան, ինչի մասին է խոսքը»,-ասաց Ներսես Պողոսյանը: Իսկ ապօրինի զենք, զինամթերքի, ինչպես նաեւ զանգվածային անկարգություններ կազմակերպելու մեջ մեղադրվող Ժիրայր Սեֆիլյանը իր գործով դատական նիստին չի մասնակցում։ Դատարանի նկատմամբ անհարգալից վերաբերմունքի համար նա հեռացված է նիստերի դահլիճից: Այսօր դատարանում շարունակեց ցուցմունք տալ նաեւ 2015թ. հինգերորդ բանակային կորպուսի լավագույն հրամանատար ճանաչված Սմբատ Գալոյանը: Դատարանի որոշմամբ, վկաների ցուցմունքների ժամանակ տեսանկարահանումն արգելվում է: Վկան, ըստ իր ցուցմունքի, անդամակցել էր Սեֆիլյանի ստեղծած խմբին, սակայն հետագայում իմացել է զորամաս զավթելու միջոցով ապստամբություն իրականացնելու մասին, ուստի, որոշել է դուրս գալ այդ խմբից: Ներսես Պողոսյանի պաշտպան Արայիկ Պապիկյանը հարցեր ուղղեց վկային, բայց վերջինս հրաժարվեց պատասխանել։ «Մեղադրողի հարցերին պատասխանելուց նա չհրաժարվեց: Այս գործի սցենարի հեղինակներն իրեն ցուցում էին տվել եւ համոզել էին, որ Պապիկյանի հարցերին չպատասխանես, որովհետեւ կմերկանար այն, ինչ նախատեսել էին»: Հանրային պաշտպան Մարինե Թովմասյանը վերստին միջնորդեց դատարան բերել Ժիրաիր Սեֆիլյանին: Հնարավոր է նա հարցեր տա վկա Սմբատ Գալոյանին: Աջափնյակ եւ Դավիթաշեն վարչական շրջանների ընդհանուր իրավասության դատարանի դատավոր Տաթեւիկ Գրիգորյանը կրկին մերժեց միջնորդությունը «Սեֆիլյանը իր դիտավորյալ գործողությունների արդյունքում զրկել է իրեն այդ հնարավորությունից»,- պարզաբանեց դատավորը: Դատական նիստը կշարունակվի հաջորդ ուրբաթ:
