«Պարոն Գասպարյանն իր չափով պիտի իր պատասխանատվությունն ունենա։ Իսկ ես չեմ երազում Վանոյի վերադարձը։ Որովհետև էնպես չէ, որ էն ժամանակ չէին սպանում։ Եթե Վանոն վերադառնա, նույնն է լինելու։ Ուղղակի եղածը բոլորս միասին պետք է շտկենք»,-այսօր ԱԺ ճեպազրույցների ժամանակ անդրադառնալով երեկ Երևանի կենտրոնում տեղի ունեցած սպանությանն ու ընդհանրապես  կրիմինոգեն իրավիճակի հետ կապված Վանո Սիրադեղյանի վերադարձի անհրաժեշտությանը՝ ասել է ՀՅԴ խմբակցության ղեկավար Արմեն Ռուստամյանը։

Կոալիցիոն հուշագրին Ծառուկյան դաշինքի միանալու հավանականության մասին հարցին ի պատասխան պրն Ռուստամյանն ասաց. «Միակ տարբերակը, որ համագործակցությունը վերանա, պետք է վերանա էն առաջնահերթությունը, որի շուրջ համախմբվել ենք։ Մենք էս տրամաբանությունը պահպանելով ենք մի անգամ դուրս եկել կոալիցիայից։ Ինչ վերաբերում է Ծառուկյանին, մենք որևէ մեկի հետ չունենք տաբու հարաբերվելու։ Եթե որևէ դաշտից մեր մոտեցումները պաշտպանողներ լինեն, մենք կհամագործակցենք»։ 

Դուք երրորդ ընկերոջ աջակցության կարիքն ունե՞ք. լրագրողի հարցին ի պատասխան Արմեն Ռուստամյանն ասում է. «Մենք բոլորի աջակցության կարիքն ունենք»։