«Սասնա ծռերի» գործով փաստաբաններին կրկին խուզարկում են (տեսանյութ)
Ավան եւ Նոր Նորք վարչական շրջանների ընդհանուր իրավասության դատարանում այսօր 2016թ. ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» զինված խմբի անդամներից 18-ի գործով նիստում դատավոր Արտուշ Գաբրիելյանը որոշեց սանկցիայի ենթարկել ամբաստանյալների պաշտպաններից Լուսինե Հակոբյանին, Հրանտ Գեւորգյանին, որոնք ավելի վաղ լքել էին նիստերի դահլիճը՝ բողոքներով դատավորի, իրենց խոսքով, ապօրինի գործողությունների դեմ: Նրանց հետեւել էր Արայիկ Պապիկյանը, ուստի նա եւս սանկցիայի ենթարկվեց: Դատարանը սանկցիայի ենթարկելու մասին համապատասխան գրությամբ կդիմի ՀՀ փաստաբանների պալատին: Դատավորը սանկցիայի ենթարկեց նաեւ պաշտպաններ Մուշեղ Շուշանյանին եւ Դավիթ Գյուջյանին, որոնք դատարան էին եկել, սակայն ներս չէին մտել՝ պատճառաբանելով, որ դատարանի կարգադրիչներն իրենց ոչ թե զննության են ենթարկում, այլ խուզարկության: Այնուհետեւ պաշտպաններից Գրիշա Բալասանյանը ներկայացրեց նիստը հետաձգելու միջնորդություն, որպեսզի փաստաբանները դիմեն Արդարադատության խորհուրդ՝ Արտուշ Գաբրիելյանին պատասխանատվության ենթարկելու համար: «Ստացվում է, որ միայն դուք ունեք մեզ պատասխանատվության ենթարկելու լիազորություն, ուստի մենք կդիմենք խորհրդին, որպեսզի ձեր վարքագիծը քննության առնվի»,-նշեց Բալասանյանը: Գաբրիելյանը միջնորդությունը մերժեց, բայց, միեւնույնն է, հետաձգեց նիստը՝ հայտարարելով, որ ինքը վատառողջ է: