Ստամբուլահայերը Հովհաննես Չեքիջյանին համերգ նվիրեցին
Սեպտեմբերի 1-ին ՀՀ սփյուռքի նախարարության նախաձեռնությամբ «Ստամբուլի հայ համայնքի օրերը Հայաստանում» ծրագրի շրջանակներում Արամ Խաչատրյան համերգասրահում կայացավ Ստամբուլի Սրբոց Վարդանանց եկեղեցու երգչախմբի համերգը՝ նվիրված Հայաստանի պետական ակադեմիական երգչախմբի գեղարվեստական ղեկավար և գլխավոր դիրիժոր, ԽՍՀՄ ժողովրդական արտիստ Հովհաննես Չեքիջյանի ծննդյան 90-ամյակին: Երգչախմբի խմբավարն է Ատրուշան Հալաջյանը:
Համերգին ներկա էին մաեստրո Հովհաննես Չեքիջյանը և կոմպոզիտոր, ՀՀ արվեստի վաստակավոր գործիչ, ՀՀ ժողովրդական արտիստ Տիգրան Մանսուրյանը :
Հնչեցին հայ և արևմտաեվրոպական կոմպոզիտորների ստեղծագործություններ:
ՀՀ սփյուռքի նախարարի տեղակալ Սերժ Սրապիոնյանը ընթերցեց նախարար Հրանուշ Հակոբյանի ողջույնի խոսքը. «Պատահական չէ, որ Կ. Պոլսից ժամանած երգչախմբի ելույթով է նշվում մեր ժամանակների կենդանի լեգենդ, Հայաստանի ազգային ակադեմիական երգչախմբի մեծանուն դիրիժոր, Պոլսում ծնված Հովհաննես Չեքիջյանի 90-ամյա հոբելյանը:
[caption id="attachment_1564719" align="alignnone" width="700"]
Concert of the St. Vardanants choir from Istanbul took place at Aram Khachaturian Concert Hall[/caption]
Արդեն ավանդույթ է դարձել պոլսահայության օրերի անցկացումը Հայրենիքում: Պոլսահայ համայնքը մշակութային հզոր ներուժ ունի: Լինի գրականություն, թե երաժշտություն, պար, թե թատերական ներկայացում. ամեն անգամ, իսկապես, անսահման հուզմունք ենք ապրում՝ ականատեսը դառնալով մեր հայրենակիցների բարձր արվեստի ամենատարբեր դրսևորումներին:
Վստահաբար կարող եմ ասել, որ Վարդանանց երգչախումբն իր գործունեությունը նվիր ել է հայկական մշակույթի պահպանմանը՝ խորապես գիտակցելով, որ այն հայ ինքնության զորացման ամենակարևոր երաշխիքներից մեկն է»:
[caption id="attachment_1564718" align="alignnone" width="700"]
Concert of the St. Vardanants choir from Istanbul took place at Aram Khachaturian Concert Hall[/caption]
Ողջույնի խոսքով հանդես եկավ երգչախմբի նախագահ Թաթուլ վարդապետ Անուշյանը: «Դուք այսօր ոչ միայն պիտի ունկնդրեք այս երգչախմբի համերգը, այլև պիտի ականատեսը լինեք մի ոգեղեն դպրաց դասի: Այդ դասերը Ստամբուլում եղել են մարդակերտումի, եկեղեցական և երաժշտական կյանքի զարգացման դասեր, կամուրջներ մշակույթների միջև: Մենք երգում ենք հայ երգը, որ գալիս է հայի արմատներից: Մշակույթների միջև կենդանի կամուրջ է դարձել նաև մեծանուն Հովհաննես Չեքիջյանը: Նա մեզ ուժ և կորով է պարգևում: Մենք աշխարհի մի անկյունում՝ մայրենի հողից հեռու, հայ երգն ենք երգում: Պատգամ ունենք վառ պահել հայ երգը»,-նշեց Թաթուլ վարդապետ Անուշյանը:
Այնուհետև ընթերցվեց Պոլսո Հայոց պատրիարքի տեղապահ Գարեգին արքեպիսկոպոս Բեքչյանի օրհնության խոսքը:
Համերգի ավարտին Սփյուռքի նախարարի տեղակալ Սերժ Սրապիոնյանը Ստամբուլի Սրբոց Վարդանանց եկեղեցու երգչախմբի դաշնակահարուհի Լուսի Գահվերճիօղլյանին Սփյուռքում հայկական արվեստը տարածելու, այդ ոլորտում ստեղծագործական և կատարողական բարձր վարպետության և իր գործունեությամբ Հայաստան-Սփյուռք գործակցության զարգացման գործում զգալի ներդրման համար պարգևատրեց Սփյուռքի նախարարության «Կոմիտաս» մեդալով: Սբ. Վարդանաց դպրաց դաս երգչախումբին շնորհվեց ՍՆ երախտագիտության մեդալ:
Խմբավար Ատրուշան Հալաճյանը պարգևատրվեց ՀՀ ՍՆ շնորհակալագրով, մենակատարներ Անեթ Մեհթերյանը, Ալիս Շահինօղլունը, Հովսեփ Գույումճյանը, Գրիգոր Թերզիյանը՝ պատվոգրերով:
