«Երկիր Ծիրանի» -ին որոշել է ներկայացնել իր գաղափարախոսությունը
«Մեծ Հայրենազրկումից և Մեծ Տրոհումից դեպի Մեծ Միացում» վերտառությամբ «Երկիր Ծիրանի» կուսակցությունը ներկայացրել է իր գաղափարախոսությունը և սկզբունքները, ինչպես նաև մոտեցումները. «ԵՐԿԻՐ ԾԻՐԱՆԻ» ԿՈՒՍԱԿՑՈՒԹՅԱՆ ԳԱՂԱՓԱՐԱԽՈՍՈՒԹՅՈՒՆԸ և ՍԿԶԲՈՒՆՔՆԵՐԸ ՄԵԾ ՀԱՅՐԵՆԱԶՐԿՈՒՄԻՑ և ՄԵԾ ՏՐՈՀՈՒՄԻՑ ԴԵՊԻ ՄԵԾ ՄԻԱՑՈՒՄ 1. Մեր ծագումը. որտեղի՞ց ենք մենք գալիս Մենք չպետք է մոռանանք, որ ազգ ենք, ոչ թե համայնք: Ազգ, որն ունի պետականություն, հինավուրց արժեքներ ու նպատակներ: Ազգ, որն ունի քաղաքական և քաղաքակրթական առաքելություն: Ազգ, որի քաղաքական ու քաղաքակրթական առաքելությունը տարածվում է Հայկական բարձրավանդակի և նրա հարակից տարածքների վրա: 2. Մեր նորագույն քաղաքական անցյալը և ներկան Մարդկությունը, և մենք այդ թվում, արդեն քանի հազարամյակ ապրում է և´ ճգնաժամային, և´ անցումային փուլերում: Հայ ազգի համար նորից եկել է ցնցում ապրելու և անցում կատարելու ժամանակը: Մենք գտնվում ենք նոր աշխարհակարգի ձևավորման գործընթացի մեջ, որի բաղկացուցիչ մասն է կազմում դարերից եկած Արևելյան հարցը (Սիրիա, Իրաք, Քրդստան, Թուրքիա և, իհարկե, Հայաստան): Սակայն մենք նոր հասարակարգի և աշխարհակարգի ձևավորման ժամանակաշրջան ենք մտել քաղաքականապես չկազմակերպված աշխարհասփյուռ հայությամբ (անդրսահմանային հայ ազգով), պատմական հայրենիքի 42 հազար քառակուսի կմ տարածքի վրա հայկական պետականությամբ` բռնակալական ավտորիտար կառուցվածքով և քաղաքականապես թերաճ, քաղաքական իրավունքներից զուրկ հայ ազգով: 3. Մեր գնահատականը Մենք քաջ գիտակցում ենք, որ չի կարելի ոչնչացնել մարդկային կամքը: Այսօր այն ոչնչացնողը մեզանում գործող գավառական, բռնակալական` ավտորիտար համակարգն է, որը մարդկային հարաբերությունները բացարձակապես բարոյազրկել է՝ դրանք դարձնելով խարդախ հաշվարկների, ապօրինի գործարքների, համատարած կոռուպցիայի, էժանագին, նվաստացուցիչ առուծախի ու ցանկացած գնով անձնական շահի սպասարկման միջոց: Մենք դեմ ենք և բացառում ենք նման քաղաքականությունը: 4. Մեր պատկերացումները Մեր գաղափարախոսությունն իդեալ է ճանաչում հայկական ազգային, ժողովրդավար պետականությունը, որը գործում է որպես` · մինչև հայրենի բնօրրանի տարածքային ամբողջականության վերականգնումը` Հայկական բարձրավանդակում և նրա հարակից տարածքներում, ներկայիս հայկական պետականության 42 հազար քառակուսի կմ տարածքի ամբողջականության երաշխավոր, ազգահավաքի իրականացման երաշխավոր, համահայկական քաղաքական, տնտեսական և մշակութային կենտրոն, հայ ազգի` երջանիկ ապրելու քաղաքական հայտը իրագործող, տարբեր պետություններում ապրող հայ ազգի հատվածներն իրար շաղկապող: Ապահովում է` · մարդու իրավունքների ու հիմնարար ազատությունների և սեփականության պաշտպանությունը, սոցիալական արդարությունը, քաղաքացիական ու քաղաքական իրավունքների հասանելիություն և մատչելիություն հայ ազգի բոլոր հատվածների համար: Երաշխավորում է` · իշխանության գործադիր, օրենսդիր և դատական ճյուղերի անկախությունը միմյանցից, նրանց միջև առկա հակակշիռների և զսպումների քաղաքական կառուցակարգը, ազատ, արդար, թափանցիկ պայմաններում պարբերաբար ընտրությունների անցկացման միջոցով գործադիր, օրենսդիր և դատական իշխանության ձևավորումը, և՛ հայկական պետականության ներքո, և՛ նրանից դուրս ապրող հայ ազգի բոլոր հատվածների համար միաժամանակ` բացարձակապես հավասար պայմաններում, քաղաքական կառավարման մարմինների ձևավորմանը և քաղաքական որոշումների կայացմանը մասնակցելու իրավունքը, իրավունքը` փոխելու կամ վերացնելու այն կառավարությունը, որը դառնում է կործանարար կյանքի, ազատության և երջանկության ձգտման համար, և հիմնադրելու նոր կառավարություն: 5. Մեր գաղափարական հայացքների ամբողջությունը գոյացել է հետևյալ շփման կետից Ազգային քաղաքական անկախության երկարատև կորուստը բացասաբար է ազդել նաև հայ ազգի քաղաքական գիտակցության վրա՝ նրան զրկելով քաղաքական ազգին բնորոշ պայքարի տենչից` հանուն քաղաքացիական և քաղաքական իրավունքների: 6. Մենք հավատում ենք` մենք ապրելու ենք մեր ազգային հեղափոխությունը և լինելու ենք ազգային, ազատ, ժողովրդավար, սեփական հայկական պետության քաղաքացիներ: Ողջ հայ ազգը պետք է պատրաստ լինի հին կարգերի փլուզմանը և ունենա նոր առաջադեմ վերնախավ, որն արագ կստանձնի պարտականություն՝ ղեկավարելու պետության բոլոր կառույցները: 7. Մեր գաղափարախոսությունը դատապարտում է` - քաղաքական և տնտեսական մենաշնորհը, - Հայ Առաքելական եկեղեցու քաղաքական և տնտեսական իրավունք-մենաշնորհը (արտոնությունները), - երևանյան գավառապետությունը, - առաջինից մինչև վերջին բոլշևիկին, - Հայրենիքը վաճառողներին, փոխանակողներին և հանձնողներին, - ՆԿՎԴ-ԿԳԲ-ԱԱԾ-չեկիզմը, բոլշևիզմը, կոմունիզմը, ՀՀՇ-ՀՀԿ արատավոր երևույթները և դրանից ածանցյալ` հետամնաց, հետադիմական «խաղաղասերների», «ծերացած» և «թույլերի» գաղափարախոսության սերմանումն ու տարածումը, - հայ ազգի հանրային միջոցները (դրամ, հող, գույք) ապօրինի օտարած (յուրացրած), զավթած օտարներին և ազգակիցներին: - մեզանից դուրս` այլ ուժերի ապավինումը: 8. Մեր գաղափարախոսությունն ընդունում և քաջալերում է` - Հայրենիք` Ազատ, Անկախ և Միացյալ, - Երևան, Ստեփանակերտ, Կարին և Սիս, - Էջմիածին և կրոնի ու դավանանքի ազատություն, - Արարատ` փառքի ճամփա, - Եվրոպա` Լուսավորություն-Ազատություն-Արդարություն, - Առաջադիմություն` Մշակույթ և Կրթություն, - Հայ ազգ` քաղաքական և քաղաքացիական, - հասարակություն` կուշտ, հողի և բնակարանի սեփականատեր, բավարարված սոցիալական պահաջմունքերով, պաշտպանված թշնամու հարաձակումներից: 9. Մեր գաղափարախոսությունը հեղափոխության կյենսակոչման կարևոր պայման է ճանաչում` - քաղաքական մենաշնորհի վերացումը, - անդրսահմանային հայ ազգի կազմակերպումը և նրան քաղաքական իրավունքների տրամադրումը, - հայ ազգի քաղաքական ազգ դառնալը` ինքնազատագրում և ինքնակազմակերպում, - հայ ազգի գիտակցության փոփոխությունը`ինքնազատագրումը, - քաղաքական իրավունքներ կրելը` ինքնակազմակերպումը, - քաղաքական իրավունքներ բանեցնելը` ինքնակազմակերպումը, - քաղաքական պատասխանատվություն ստանձնելը` ինքնահամախմբումը: 10. Մեր գաղափարախոսության կարգախոսներն են` - Հայ ազգը ունի քաղաքակրթական առաքելություն, - Հայ ազգը ունի քաղաքական առաքելություն - Մասնատված հայ ազգը և նրա մասնատված հայրենիքը միավորվելու են, - Գիտելիքահեն հասարակություն` հայ ազգը մասնակցում է, - Մեր երկրի ամենաարժեքավոր և ամենակարևոր ռեսուրսը մարդն է, - Մենք ակտիվ կերպով հավաքագրելու ենք մեր բազմամիլիոնանոց ազատատենչ քաղաքական ներուժը, - Մենք ապավինում ենք հայկական զինված ուժերին: 11. Ազգային քաղաքական անկախությունը և ժողովրդավարությունը հայ ազգի յուրաքանչյուր ներկայացուցչի հնարավորություն է ընձեռելու ունենալ` - արժանապատիվ վարձատրությամբ աշխատանք, - սեփական հող և բնակարան, - սոցիալական պահանջմունքների բավարարում, 12. Մեր գաղափարախոսության հիմնաքարերն են` - Ազգային դպրոց` ազգային կրթական համակարգ, - Հայրենիքի հարցում զիջումներ չեն լինում, - Հայրենիքի կորուստը վաղեմության ժամկետ չունի, - Անցավորներից մինչև նոր ծնվող հայ երեխան Հայկական բարձրավանդակի և նրա հարակից հողի տերն են, - Համընդգրկուն քաղաքական միասնություն` ինքնազատագրում, ինքնակազմակերպում և ինքնահամախմբում: 13. Մեր գաղափարախոսության դրոշմում է` · Երկիր Ծիրանի, Արմենիա, Հայաստան` Հայկական բարձրավանդակ և նրա հարակից տարածքներ, Դեպի Արարատ, Քելե լաո, քելե էրթանք մեր Էրգիր` վերադառնալու ենք, Հայ ազգ` լեզու, մշակույթ, ինքնություն և քաղաքակրթություն: 14. Մեր պահանջներն են Մեր ազգային ինքնությունը պետք է հետևի, այն մտքին, որի հիմքում ընկած է մարդկային միասնությունը, որը իրեն վկայակոչում է որպես մեկ ամբողջություն` մենք` մենք ազգովի: Մենք հավատում ենք` մենք ապրելու ենք մեր ազգային հեղափոխությունը և լինելու ենք ազգային, ազատ, ժողովրդավար, սեփական հայկական պետության քաղաքացիներ: 15. Մեր գործողություններն են` Ազգային քաղաքական ընտրանի և ժամանակավոր կառավարություն · Ձևավորել հայ ազգի երկու հատվածներից (անդրսահմանային և հայկական պետականության ներքո ապրող) քաղաքական ընտրանի, որը կսերմանի ու կտարածի ազգային և համամարդկային արժեքներ, կատարելատիպեր, գաղափարախոսություն և կընդունի այդ արժեհամակարգին համապատասխան նորմատիվային իրավական ակտեր: Ձևավորել ժամանակավոր կառավարության գործունեությունը, որը մաքուր ձեռքերով ու հանգիստ խղճով կվերացնի բռնակալությունը/ավտորիտարիզմը և կհիմնադրի ժողովրդավարական համակարգ: Հայ ազգի միասնական քաղաքական ներգրավվածություն · Գիտակցված և պահանջված դարձնել քաղաքական գործընթացներին մասնակցելը հայ ազգի երկու հատվածների` և´ հայկական պետականության ներքո ապրող, և´ անդրսահմանային հայ ազգի համար: Քարոզել բազմակի քաղաքացիության ձեռքբերումը: Անդրսահմանային ազգի սերտաճում հայկական պետականության հանրային և քաղաքական գործընթացներում: Հայ ազգի արժանապատվության վերականգնում · Ներշնչել հայ ազգին վերականգնել հավատն իր ուժերի նկատմամբ: Լուսավորել և տրամադրել քաղաքական իրավունքներ: Հաղթահարել անվստահության, վախի և անլիարժեքության բարդույթը: Գավառապետության` բռնապետության վերացում · Տապալել բռնապետական` ավտորիտար համակարգը: Դատապարտել (քաղաքական և իրավական ընթացակարգերով) ավտորիտար համակարգի բոլոր միավորների և սպասավորների գործունեությունը: Ավտորիտարիզմի, «մի կերպ գոյատևման» մտայնության, հարմարվողականության գաղափարախոսության արգելում, դրա բոլոր արատների մերկացում և արմատական ոչնչացման անհրաժեշտության գիտակցման սերմանում: Համաշխարհային քարոզարշավի անցկացում · Տարածել գաղափարախոսություն, սկզբունքներ և ծրագիր: Հավաքագրել հայ ազգի զավակներին և վերականգնել հայ ազգի քաղաքական առաքելությունը: Կենսակոչել հայ ազգի քաղաքական առաքելությունը` հիմնադրելով կառույցներ Կանադայում, ԱՄՆ-ում, Եվրոպայում, ՌԴ-ում, Միջին Արևելքում և այլ երկրների հայկական գաղութներում: Կազմակերպել հայ ազգի քաղաքական առաքելության հայտը` սպասարկելու համար գլոբալ քաղաքական ժողով · Ընտրել քաղաքական վերնախավ (ժամանակավոր կառավարության անդամներ): Ընդունել գործունեության սկզբունքների վերաբերյալ հուշագիր: Հաստատել ժամանակավոր կառավարության ծրագիրը:
