Արմեն Ամիրյանի, Վիգեն Չալդրանյանի մայրերի ու այլ հայտնի տիկնիկներ՝ երևանյան պատկերասրահում
Դռները բացվում են ու դիմացդ կանգնած են ծերացած Վլադիմիր Պուտինն ու Շառլ Ազնավուրը, քիչ այն կողմ հարբած ռուս մուրացկանն է ու գյուղական հագուստով Մհեր Մկրտչյանը: Սենյակի վերջնամասում անգլիական թագավորական ընտանիքն է՝ իր ողջ վեհությամբ: Դուք Երևանի «Տիկնիկների պատկերասրահում» եք, Հանրապետության հրապարակում:
Աշխարհում առաջին հեղինակային տիկնիկը պատրաստվել է 1881 թվականին Ֆրանսիայում: Հայաստանում տիկնիկագործությունը սկսել է զարգանալ 20-րդ դարի երկրորդ կեսից: Երևանի «Տիկնիկների պատկերասրահ»-ը բացվել է այս տարվա մարտ ամսին մշակույթի նախարարության աջակցությամբ: Թանգարանի այցելուների թիվը գերազանցում է 6000-ը: «Ա 1 +»-ի հետ զրույցում պատկերասրահի գեղարվեստական ղեկավար Մարինա Խաչմանուկյանը ներկայացրեց պատկերասրահի ստեղծման պատմությունը:
«Արդեն 10 տարի է, ինչ ես հավաքում եմ տիկնիկներ և ուսումնասիրում: Կազմակերպել եմ ցուցահանդեսներ ու միջոցառումներ: Աշխարհում գոյություն ունի մոտ 1000 տիկնիկների թանգարան, ու այդ փաստն ինձ մտահոգեց: Մտածեցի, որ վատ չէր լինի Հայաստանում նույնպես ունենալ այդպիսի թանգարան, քանի որ տիկնիկի միջոցով կարող ենք ներկայացնել հայ մշակույթը: Ես այդ ամենը ներկայացրեցի մշակույթի նախարար Արմեն Ամիրյանին, և Ամանորի նախօրեին նա ինձ տվեց դրական պատասխան։ Սկսեցին պատկերասրահի բացման աշխատանքները»:
Մ.Խաչմանուկյանը կարծում է, որ ժամանակն է, որպեսզի տիկնիկները վերնիսաժային ու խանութային կարգավիճակից ստանան թանգարանային կարգավիճակ. «Մենք ունենք հայկական ծիսական տիկնիկներ, որոնք ունեն հարուստ մշակութային պատմություն:Այդ տիկնիկները ներկայացված են պատկերասրահում: Տիկնիկները օժտված են եղել մոգական ուժով: Օրինակ մենք թանգարանում ունենք Բարեկենդանի տոնին բնորոշ տիկնիկը, որի անունը Ուտիս տատիկ է։ Նա քեֆի և ուրախության տատիկն է: Ասում են, որ տոնի ավարտի ժամանակ այդ տիկնիկին ձորից նետել են ներքև: Նրան հաջորդել է Մեծ պահքի տիկնիկը, որի անունը Պաս պապիկ է: Տիկնիկները ունեն նաև բուժիչ հատկություն և պատահական չէ, որ աշխարհում զարգանում է տիկնիկաթերապիան»:
Պատկերասրահի գեղարվեստական ղեկավարը ներկայացրեց նաև թանգարանի կառուցվածքն ու ցուցադրվող տիկնիկների հեղինակներին:
«Պատկերասրահը բաղկացած է 2 մասից: Առաջին մասում ցուցադրվում են հայկական ծիսական տիկնիկները, իսկ երկրորդ մասում աշխարհահռչակ մարդկանց, հայ հայտնի արվեստագետների, ինչպես նաև այլ թեմաներով պատրաստված տիկնիկներ: Պատկերասրահին իր մոր տիկնիկներն է նվիրել նախարար Արմեն Ամիրյանը: Դրանք պատկերասրահի ամենահին տիկնիկներն են՝ մոտ 60 տարեկան: Այստեղ են նաև Վիգեն Չալդրանյանի մոր աշխատանքները, ինչպես նաև առաջին հայ տիկնիկագործի՝ Մարի Երկաթի աշխատանքները: Մեզ 40 տիկնիկներ ուղարկել է ԱՄՆ-ից Ալիս Նավասարգյանը, որը տարիներ շարունակ հավաքել է տիկնիկներ, ու իր հարազատները հորդորել են նվիրել ԱՄՆ նախկին առաջին տիկին Միշել Օբամային, սակայն նա նվիրել է հենց մեզ»:
Այս թանգարանը գրավում է նաև զբոսաշրջիկներին. «Այդ ծիսական պատմությունները հստակ ներկայացնում են մեր ազգային տոներն ու սովորույթները: Մեր բոլոր այցելուները մեծ բավականություն ստացած դուրս են գալիս այստեղից ու իրենց հիացմունքը հայտնում: Հուսով եմ, որ տիկնիկի արվեստն ու տիկնիկագործությունը մեծ զարգացում կապրի Հայաստանում ու մեր պատկերասրահը ժամանակի ընթացքում կստանա նաև թանգարանային կարգավիճակ»:
Պատկերասրահից դուրս գալուց առաջ մոտեցա նշումների մատյանին, պատահականության սկզբունքով բացեցի մի էջ ու կարդացի. «Շնորհակալություն Ձեզ, որ կարողացաք այսքան տարիներ հետո ինձ վերադարձնել մանկություն»:
