Տիգրան Հարությունյանը՝ շախմատի Հայաստանի առաջնության առաջին խմբի հաղթող
Երևանում՝ Տիգրան Պետրոսյանի անվան շախմատի տանը, տեղի ունեցավ Հայաստանի 78-րդ առաջնության առաջին խմբի մրցաշարի փակման արարողությունը, որին ներկա գտնվեցին Հայաստանի շախմատային ֆեդերացիայի նախագահի առաջին տեղակալ Սմբատ Լպուտյանը և Հայաստանի շախմատային ֆեդերացիայի գործադիր տնօրեն Հրաչիկ Թավադյանը: Սմբատ Լպուտյանը շնորհավորեց մրցանակակիրներին և նշեց, որ մրցաշարն անցավ հետաքրքիր և անզիջում պայքարում: Այնուհետև արդյունքներն ամփոփեց մրցաշարի գլխավոր մրցավար, միջազգային կարգի մրցավար Անուշավան Առաքելյանը: 14 օր շարունակ մրցաշարի մասնակիցները պայքարում էին Հայաստանի առաջնության բարձրագույն խմբի երեք ուղեգրերի համար: Մրցաշարում հիանալի ելույթ ունեցավ և առաջին հորիզոնականը զբաղեցրեց Տիգրան Հարությունյանը, ով մրցաշարի 3-րդ տուրից սկսած միանձնյա գլխավորում էր աղյուսակը: Բարձրագույն խմբի մյուս երկու ուղեգրերի համար ընթանում էր անզիջում պայքար. վերջին տուրից առաջ միանգամից 5 շախմատիստ՝ Մանուէլ Պետրոսյանը, Նորայր Թորոսյանը, Շանթ Սարգսյանը, Դավիթ Շահինյանը և Արամ Հակոբյանը, հնարավորություն ունեին գրավելու 2-րդ և 3-րդ հորիզոնականները: Համաձայն վիճակահանություն 5 թեկնածուներից չորսը մրցում էին միմյանց դեմ. Արամ Հակոբյանը՝ Մանուէլ Պետրոսյանի, իսկ Դավիթ Շահինյանը՝ Նորայր Թորոսյանի: Վերջին տուրում Շանթ Սարգսյանի մրցակիցն էր Հովիկ Հայրապետյանը: Նյարդերի պայքարում ուժեղ գտնվեցին Շանթ Սարգսյանը և Մանուէլ Պետրոսյանը: Սարգսյանը առավելության հասավ Հովիկ Հայրապետյանի նկատմամբ, իսկ Մանուէլ Պետրոսյանը դժվար պայքարում կարողացավ հասնել իրեն ձեռնտու ոչ-ոքի արդյունքի, որի շնորհիվ զբաղեցրեց 2-դր հորիզոնականը: Նորայր Թորոսյան – Դավիթ Շահինյան պարտիան ավարտվեց հաշտությամբ և երկուսն էլ մնացին առանց բաղձալի ուղեգրերի. Թորոսյանը զբաղեցրեց 4-րդ հորիզոնականը, իսկ Շահինյանը՝ 6-րդ: Եզրափակիչ աղյուսակ.
1 | Հարությունյան Տիգրան | 9/13 | 2513 |
2 | Պետրոսյան Մանուէլ | 8½/13 | 2565 |
3 | Սարգսյան Շանթ | 8½/13 | 2416 |
4 | Թորոսյան Նորայր | 8/13 | 2350 |
5 | Հակոբյան Արամ | 8/13 | 2466 |
6 | Շահինյան Դավիթ | 7½/13 | 2428 |
7 | Միքայելյան Արման | 6½/13 | 2486 |
8 | Հարությունյան Գևորգ | 6½/13 | 2454 |
9 | Քալաշյան Դավիթ | 6/13 | 2389 |
10 | Մանուկյան Սարգիս Ա. | 5½/13 | 2233 |
11 | Հայրապետյան Հովիկ | 5/13 | 2502 |
12 | Բաղդասարյան Վահե | 4½/13 | 2469 |
13 | Դանիելյան Վահե | 4½/13 | 2344 |
14 | Մկրտչյան Էդուարդ | 3/13 | 2203 |