«Իրենց անասնական հանգստի համար թշնամու կամակատար հակահայեր միշտ էլ եղել են» (տեսանյութ)
Մեր պատմության ընթացքում, ավաղ, միշտ էլ եղել են ու կան Գարեգին Նժդեհի բնորոշմամբ՝ «... մի կտոր անսուրբ հացի և իրենց անասնական հանգստի համար արտաքին թշնամու կամակատար» հակահայեր: Հայ բոլշևիկների մեջ էլ ստոր դավաճանների պակաս չի եղել, որոնց ձեռքով իրագործվեցին ստալինյան ռեժիմի ահաբեկություններն ու բռնադատումները:
Հովհաննես Թումանյանի թանգարանի մուտքի բացօթյա տարածքում բացվել է խորհրդային տարիների բռնատիրության զոհերին նվիրված «Խավարում» խորագրով ցուցադրությունը:
«Մեր խնդիրը ոչ թե Լենինն էր, Ստալինը, Բերիան, Յագոդան կամ Եժովը, այլ էն հայ տականքները, որոնց ձեռքով իրականացվեց այս տեռորը: Այդ հինգերորդ շարասյան որոշների անունները կան գրված՝ Խաչիկ Մուղդուսի, Ասքանազ Մռավյան, Նաիրի Զարյան, Գևորգ Աթարբեկյան...,-ասում է ցուցադրության կազմակերպիչ, Հովհաննես Թումանյանի տուն-թանգարանի տնօրեն Նարինե Թուխիկյանը:-Ցավոք, ամեն ինչ կրկնվելու սովորություն ունի և ինչպես Թումանյանն էր ասում, մենք ներսից ենք պղծված և մինչև չբացահայտենք մեր ներսի տականքին, մենք այս արատավոր շրջանի մեջ ենք լինելու»։
Հովհաննես Թումանյանի չորս որդիները ևս դարձան Օսմանյան և բոլշևիկյան ռեժիմների զոհ: Արտավազդը սպանվեց Վանում՝ 1918-ին, իսկ Մուշեղը, Համլիկն ու Արեգը աքսորվեցին ու գնդակահարվեցին:
Տիկին Թուխիկյանի խոսքով՝ այս ցուցադրության նպատակը տեղեկություն տալն է: Հաշվեհարդարը՝ նաև ինֆորմացիան է, որ պետք է փոխանցվի երիտասարդ սերնդին, իսկ մենք ունենք այսօր հրաշալի մի սերունդ, որը պետք է պայքարի հայրենիքի անկախության համար, պայքարի որևէ երկրի ուղարկած ծպտյալ գործակալների դեմ:
Ցուցադրությունը կտևի մինչև աշնան վերջ:
[caption id="attachment_1560215" align="alignnone" width="720"]
Հովհաննես Թումանյանի բռնադատված որդիները[/caption]
