Գևորգ Սաֆարյանի հարցում ՄԻՊ-ի համար դեռ անհասկանալի պահ կա (տեսանյութ)
Հիմնադիր խորհրդարանի անդամ Գևորգ Սաֆարյանի պահման պայմանները անընդունելի են Մարդու իրավունքների պաշտպանի համար. «Խոսքը վերաբերում է եւ խոնավությանը, եւ միջատների առկայությանը եւ բնական լույսի ներթափանցմանը: Այդ հարկը եւ խցերը խնդիրներ ունեն, դեզինֆեկցիայի անհրաժեշտություն կա»,- նշում է ՀՀ ՄԻՊ Արման Թաթոյանը: Քրեակատարողական հիմնարկների գրեթե բոլոր խցերն ու պատժախցերն ունեն նմանատիպ խնդիրներ, եւ պետությունը դեռեւս պատշաճ լուծում չի տվել: «ՔԿՀ- ների ընդհանուր վիճակն է պրոբլեմային, մենք ունենք խցեր, որ անընդունելի պայմաններում են: Այնտեղ անընդունելի են պայմանները նաեւ աշխատակիցների համար, բայց սրանց համար հիմնարար լուծումներ են պետք, նոր ՔԿՀ-ներ պետք է կառուցվեն»: Օմբուդսմենի համար դեռեւս չպարզված մի հարց կա. Ի՞նչ հիմքով է Գեւորգ Սաֆարյանը տեղափոխվել պատժախուց։ Այս ու նաեւ Գեւորգ Սաֆարյանի առողջական վիճակը մնալու է ՄԻՊ գրասենյակի ուշադրության կենտրոնում: «Նուբարաշեն» քրեակատարողական հիմնարկի ղեկավարությունը 23 օր պատժախցում պահելուց հետո երեկ առավոտյան Գեւորգ Սաֆարյանին տեղափոխել է մի խուց, որտեղ ենթադրվում է՝ նրան վտանգ չի սպառնա։ Նախապես Գեւորգին ցանկանում էին տեղափոխել մի մասնաշենք, որտեղ, նրա հայտարարությամբ, իր կյանքին վտանգ էր սպառնում քրեական հեղինակությունների կողմից։ Արման Թաթոյանը օրերս այցելել է նաեւ Հայաստան տեղափոխված Հրաչյա Հարությունյանին, որը ռուսական բանտում էր հայտնվել խոշոր ավտովթարի պատճառ դառնալուց հետո։ Օմբուդսմենի պնդմամբ ՝ նրա տրամադրությունը բարձր է, անցնում է բժշկական հետազոտություններ։ Ավելին՝ տեսանյութով