Բերման է ենթարկվել հոգեբանի մահվան գործով հետախուզվողը (տեսանյութ)
Ոստիկանության Կենտրոնականի բաժնի ծառայողների ձեռնարկած օպերատիվ-հետախուզական միջոցառումների շնորհիվ հուլիսի 21-ին բերման է ենթարկվել 1983 թ. ծնված Հրանտ Հ.-ն, որը հուլիսի 20-ից հետախուզվում էր ՀՀ քրեական օրենսգրքի 112 հոդվածի 2-րդ մասի 2-րդ և 14-րդ կետերի մեղադրանքով: Հիշեցնենք՝ բերման ենթարկվածը, ըստ նյութերի, թուղթ կտրելու դանակով հարվածներ է հասցրել հոգեբան Ռ. Պողոսյանի դեմքին և գլխին՝ պատճառելով վնասվածքներ։ Հոգեբանը հիվանդանոցում մահացել է։ Քննչական կոմիտեն հուլիսի 20-ից հետախուզում էր հայտարարել։ Հուլիսի 17-ին, ժամը 14.45-ին, հիվանդանոցից ոստիկանության Կենտրոնականի բաժնում հաղորդում է ստացվել, որ «դեմքի կտրած վերք, բազմաթիվ վերքեր, արյունահոսություն» ախտորոշմամբ բուժօգնության է տեղափոխվել 1947 թ. ծնված Ռուբեն Պողոսյանը: Ոստիկանության ծառայողների ձեռնարկած միջոցառումների շնորհիվ պարզվել է, որ նույն օրը, ժամը 14.00-ին, Մաշտոցի պողոտայի 40 շենքում գործող հոգեբանական կենտրոնում 1983 թ. ծնված Հրանտ Հ.-ն թուղթ կտրելու դանակով հարվածներ է հասցրել Ռ. Պողոսյանի դեմքին և գլխին՝ պատճառելով վնասվածքներ: Նշանակվել է ԴԲՓ: Հուլիսի 20-ին, ժամը 2.10-ին, Ռուբեն Պողոսյանը հիվանդանոցում, գիտակցության չգալով, մահացել է: Նախաքննությունը շարունակվում է:
