«Եթե նյութերը արտադրվեն Հայաստանում, ծախսերը 2 անգամ քիչ կլինեն» (տեսանյութ)
Ալաշկերտցի խաղողագործ Էդիկ Հարությունյանը արդեն մի քանի ամիս է անցել է կաթիլային ոռոգման համակարգին: Նոր համակարգի առաջին օգուտներն արդեն իր համար ակներեւ են։ «Կաթիլայինով խոնավանում է հողը, երկու օր առաջ եմ ջուր արել, բայց հողը դեռ խոնավ ա, բույսը սթրես չի ապրում, կարգին ջրվում ա, ոռոգման ջրով 30 տոկոսն էր հասնում տեղ, 70 տոկոսը ջրի ցնդում էր»,- ասում է Էդիկ Հարությունյանը: Ֆերմերն այս տարի միացել է ՄԱԿ-ի պարենի եւ գյուղատնտեսության կազմակերպության ծրագրին: Ոռոգման համակարգի այս մեթոդին ՄԱԿ-ի աջակցությամբ միացել է եւս 8 ֆերմերային տնտեսություն: Նպատակը՝ ստացված արդյունքը եւ դրական կողմերը մյուս գյուղատնտեսներին ցուցադրելու համար է: Ցուցադրության համար, 12 տնտեսությունում տեղադրվել է նաև կարկտապաշտպան ցանց: 1 հա հողատարածք կարկտապաշտպան ցանցով ու կաթիլային ոռոգման համակարգով ապահովելու համար անհրաժեշտ է 18-20 հազար դոլար։ Ծրագրի շահառուների ծախսերի կեսը հոգացել է Եվրամիությունը: Մյուս գյուղացիների համար այն ավելի հասանելի դարձնելու համար, ծրագրի կազմակերպիչների կարծիքով լավագույն միջոցը կլինի այն, որ համակարգը ապահովող նյութերը արտադրվեն Հայստանում, այլ ոչ թե ներկրվեն: Այդպես ծախսերը մոտ երկու անգամ մատչելի կլինեն: