Արայիկ Խանդոյանը գլխապտույտ ունի, դանդաղ է խոսում. պաշտպան (տեսանյութ)
«Սասնա ծռեր» խմբի անդամ Արայիկ Խանդոյանի առողջական վիճակը ծայրահեղ ծանր է: Հայտարարում է պաշտպանը՝ «Նուբարաշեն» ՔԿՀ-ում տեսակցելուց հետո։ «Գլխապտույտներ ուներ, ահավոր գլխացավեր, աչքերի բիբերը վերեւ էր եւ խոսակցականը դանդաղ էր»,- «Ա1+»-ին ասաց պաշտպան Արա Ղարագյոզյանը: Հունիսի 28-ին Ավան եւ Նոր Նորք վարչական շրջանների ընդհանուր իրավասության դատարանի շենքի նկուղում «Սասնա ծռեր» խմբի 5 անդամների՝ այդ թվում Արայիկ Խանդոյանի նկատմամբ ոստիկանների կողմից բռնություն էր գործադրվել: «Հարվածներ է հասցվել գլխի շրջանում, գլուխը շոշափեցի ուռած տեղեր կային, թեեւ ՔԿՀ-ն նշում է, որ արտաքին զննություն են իրականացրել: Այո, արտաքին զննությամբ երեւում է միայն իմ պաշտպանյալի մարմնի վրա առկա վնասվածքները, բայց ներքին զննություն չի իրականացվել»: Պաշտպանը միջնորդություն է ներկայացրել Նուբարաշեն ՔԿՀ պետին՝ քաղաքացիական հիվանդանոցում Արայիկ Խանդոյանի գլխուղեղի համակարգչային տոմոգրաֆիա անցկացնելու վերաբերյալ՝ պարզելու, թե գլխացավերն ինչի հետեւանքով են: Հատուկ քննչական ծառայությունում երեկ հարուցվել է քրեական գործ պաշտոնեական լիազորությունները անցնելու հատկանիշներով։ Պաշտպանի կարծիքով՝ գործն այլ հոդվածով պետք է հարուցվեր «Մեր Քրեական օրենսգրքում կա նման հոդված խոշտանգում: Ծեծի հետեւանքով իմ պաշտպանյալը թե հոգեբանական, թե ֆիզիկական ցավերի մեջ է գտնվում»,- ավելացրեց պաշտպանը: Արա Ղարագյոզյանը Գլխավոր դատախազից խնդրել էր գործը չուղարկել ՀՔԾ, քանի որ «Սասնա ծռեր»-ի գործով նախաքննությունը նրանք են իրականացրել: «Իրականացրել է ապօրինի քրեական հետապնդում՝ մի շարք քրեական նորմի խախտումներով եւ հիմա այդ անձինք պետք է իրականացնեն բռնության գործով նախաքննությունը, որն անթույլատրելի է: Արդյունավետ քննություն ՀՔԾ-ից մենք չենք ակնկալում»: Ոստիկանությունը հայտարարում է, որ ամբաստանյալների նկատմամբ կիրառվել ֆիզիկական ուժ՝ անհնազանդությունը խափանելու նպատակով։ Դատական նիստերի դահլիճից դուրս բերվելուց հետո, նրանք ոստիկանության ծառայողների նկատմամբ ցուցաբերել են ակտիվ անհնազանդություն, անձնապես վիրավորել վերջիններիս: Ոստիկանությունը չի բացառել, որ առաջնային քերծվածքներ լինեն ոստիկանության կիրառած ուժի արդյունքում, բայց նաեւ այլ վարկած է ներկայացրել։ Ամբաստանյալներից ոմանք էլ իրենց դժգոհությունն արտահայտել են խցերի դռներին ձեռքերով և ոտքերով հարվածելով, եւ հնարավոր է այդ ժամանակ ստացած լինեն վնասվածքները: «Ոստիկանության նման հայտարարությունը նրանք որակեցին հերյուրանք: Եթե վերցնենք իմ պաշտպանյալը եւ մյուսները ձեռքերով եւ ոտքերով դիմացով հարվածել են պատին եւ դռանը ո՞նց է լինում, որ իմ պաշտպանյալը ոտքի հետեւի մասում է վնասվածք ստանում, դա ծիծաղելի է: Իմ պաշտպանյալի աչքը կարմրած էր, ի՞նչ է նա գլխով վնասվածքներ է հասցրել դռանը»,- ավելացնում է պաշտպան Արա Ղարագյոզյանը: ՄԻՊ ներկայացուցիչները միջադեպից հետո այցելել էին կալանավորվածներին եւ արձանագրել նրանց վնասվածքները: Ձեռք բերված բոլոր տվյալները ՄԻՊ գրասենյակը սահմանված կարգով ամփոփել է եւ ուղարկվել է ՀՀ գլխավոր դատախազություն՝ քրեական վարույթի շրջանակներում դրանք ստուգելու, անհրաժեշտ իրավական գնահատական տալու հարցը լուծելու նպատակով:
