Ուկրաինան ենթարկվել է լայնամասշտաբ կիբերհարձակման (տեսանյութ)
Ուկրաինայում հանրային մի շարք կարևոր հաստատություններ, այդ թվում՝ բանկեր, արդյունաբերական խոշոր հիմնարկներ, փոստային ծառայությունը և Կիևի միջազգային օդանավակայանն այսօր ենթարկվել են կիբերհարձակման: Հաքերային հարձակումների մասին է հայտնել նաեւ Բորիսպոլ օդանավակայանի գլխավոր տնօրեն Պավել Ռյաբիկինը։ Նրա խոսքով չի աշխատում նաեւ օդավակայանի կայքը ու չվերթների գրանցման էկրանը։ Ռյաբիկինը խափանումների պատճառ է անվանել սպամ հարձակումը, հայտնի չէ՝ արդյոք հաքերների այդ գործողությունները կապակցված են դրամաշորթ վիրուսի հետ։ Ուկրաինայի փոխվարչապետ Պավլո Ռոզենկոն «Ֆեյսբուքի» իր էջում նշել է, որ կառավարության բոլոր պաշտոնյաների համակարգիչների վահանակներին հայտնվել է ծանուցում այն մասին, թե կուտակված ողջ տեղեկատվությունը կջնջվի, եթե օգտատերն անջատի համակարգիչը: «Կառավարության քարտուղարության ամբողջ ցանցն արգելափակվել է․ այն կամ անջատվել է անվտանգության համակարգի կողմից, կամ հաքերային հարձակման է ենթարկվել»- գրել է Ռոզենկոն: Ուկրաինայի կենտրոնական բանկը հաղորդել է, որ անհայտ ծագման վիրուսը ներթափանցել է մի շարք բանկերի կայքէջեր: Գրոհի է ենթարկվել նաև էլեկտրամատակարարման պետական օպերատոր «Ուկրէներգոն», ինչից հետո հոսանքի մատակարարման խափանումների մասին են հայտնել «Կիևէներգոն», «Դնիպրոէներգոն», «Զապորոժիեէներգոն», ինչպես նաև օդանավեր արտադրող՝ Անտոնովի անվան պետական գործարանը:
