«Սասնա ծռեր» խմբի անդամը ցանկանում է կրթություն ստանալ (տեսանյութ)
«Սասնա ծռեր» խմբի անդամ Արամ Մանուկյանի առողջական վիճակը մտահոգում է նրա հարազատներին։ «Ներկայումս իրենց ֆիզիոթերապիա է պետք, ոչ սարքավորումներ կան «Դատապարտյալների հիվանդանոց»-ում, ոչ էլ: Եվ հայրս եւ եղբայրս փորձում իրենց ոտքը մարզել: Վարժություններ են անում օրը մի քանի ժամ, բայց, քանի որ բժշկի ցուցում չկա, վախենամ սխալ բան չանեն: Ուզում ենք նորմալ բժիշկ գտնել, որ այցելի իրենց մոտ»,- «Ա1+»-ին ասաց Ասպրամ Մանուկյանը: Պաշտպան Ինեսա Պետրոսյանն ավելացնում է՝ Արամն իր վիրահատությունից հետո, անցյալ տարվա հուլիսից ամեն օր ջերմում է եւ ոտքը բարակել է: Քրեակատարողական վարչության հանրային կապերի բաժնից պնդում են՝ Արամ Մանուկյանի առողջական վիճակը բավարար է, իսկ ջերմությունը կապված է նրա մարմնում օտար մարմնի առկայության հետ։ Այստեղ պնդում են՝ բժշկական կոնսիլիումը ֆիզիոթերապիա չի նշանակել: Արամ Մանուկյանը հրազենային վնասվածքներ էր ստացել ՊՊԾ գնդում գտնվելու ժամանակ՝ 2016թ հուլիսի 26-ի ուշ երեկոյան։ Ինեսա Պետրոսյանի մյուս պաշտպանյալները՝ «Սասնա ծռեր» -ի անդամներ Պավել Մանուկյանը եւ Արմեն Լամբարյանը եւս ստացել էին հրազենային վիրավորումներ: Իր պաշտպանյալներին Ինեսա Պետրոսյանը համարում է տուժող. «Նրանց նկատմամբ կիրառվել է այդպիսի զենք, նրանց ծանր վնասվածքներ են պատճառվել եւ առկա է փորձագետի եզրակացություն: Ճիշտ է նրանք տուժող չեն ճանաչվել, բայց տուժող են պետության կողմից, պետությունն է այդպիսի վիճակի հասցրել , հիմա պետությունը չի ստանձնում իր պարտավորությունը, որպեսզի ստանձնի նրանց հետագա բուժումը: Արմեն Լամբարյանի ոտքը տեսեք ինչքան է կարճացել, նա չի կարողանում նորմալ տեղաշարժվել, նույնը՝ Պավլիկ Մանուկյանը, նույնը՝ Արամ Մանուկյանը»: «Սասնա ծռեր» խմբի անդամ Արամ Մանուկյանը նույնիսկ անազատության մեջ կրթվելու ցանկությունը չի կորցրել: Իր համալսարանը՝Ճարտարապետաշինարարականը, մերժեց մեզ, չնայած, որ Արդարադատության նախարարության թույլտվությունը կար, ՔԿՀ-ի թույլտվությունը կար: Հիմա դիմել ենք Տնտեսագիտական համալսարան, հուսով ենք, որ դիմումը կընդունեն եւ կկարողանա ուսումը շարունակել»,- «Ա1+»-ին ասաց Արամ Մանուկյանի քույրը՝ Ասպրամ Մանուկյանը: Առայժմ հարազատները սպասում են պատասխանի, իսկ Արամ Մանուկյանի եւ մյուսների գործով նախաքննությունն արդեն ավարտվել է ։ Գործն ուղարկվել է դատարան, սակայն նիստի օրը դեռ հայտնի չէ:
