«Ոսկե ծիրանն»` առանց նորամուծությունների (տեսանյութ)
«Ոսկե ծիրան» Երեւանի միջազգային կինոփառատոնը այս տարի չի առանձնանա նախորդ տարվա ծրագրից: Կազմակերպիչները բոլոր նորամուծությունները տեղափոխել են հաջորդ հոբելյանական տարվան: Այս տարի արտամրցութային ծրագրերում կցուցադրվի ավելի քան 70 ֆիլմ: Արտամրցութային ֆիլմերը կբաժանվեն երեք ծրագրի՝ Երեւանյան պրեմիերաներ, Հետահայաց ցուցադրություններ եւ Հարգանքի տուրք: Փառատոնի ծրագրերի տնօրեն Միքայել Ստամբոլցյանը նշել է, որ հարգանքի տուրք բաժնում կցուցադրեն լեհական կինոյի մեծ վարպետ Անջեյ Վայդայի վերջին ֆիլմը: Նա նախորդ տարի 90 տարեկան հասակում հեռացել է կյանքից: «Վայդային մենք վաղուց էինք ցանկանում հրավիրել եւ նույնիսկ երկու տարի առաջ բանակցություններ էին ցանկանում վարել նրան Հայաստան հրավիրելու համար: Համաձայնվել էր գալ, բայց հետո բժիշկներն արգելեցին նրան ինքնաթիռ նստել, և այդպես էլ մրցանակը մնաց: Այդ ֆիլմի ցուցադրման օրը Լեհաստանի դեսպանին կհանձնենք մրցանակը, որը կփոխանցվի Վայդայի ընտանիքին»,- ասաց Միքայել Ստամբոլցյանը: «Ոսկե ծիրանն» այս տարի եւս հանդիսատեսին և կինոսեր հասարակությանը կծանոթացնեն համաշխարհային կինոարվեստի գլուխգործոցներին Փառատոնը կանցկացվի հուլիսի 9-16-ն ընկած ժամանակահատվածում: Փառատոնն ստացել էր մոտ 1100 հայտ՝ 96 երկրից: Մրցութային և արտամրցութային տարբեր ծրագրերում ընդգրկվել է ավելի քան 100 ֆիլմ: