Գրավեք ձեր Փարիզը, ինչպես դա արեց Ազնավուրը (տեսանյութ)
Արդեն 90-ն անց, բայց մանկան աչքերով. Օպերայի և բալետի ազգային ակադեմիական թատրոնում հանդիսատեսն այսօր, Շառլ Ազնավուրի կողքին նստած, տեղափոխվել էր Փարիզ, Ազնավուրի երազների Փարիզը, որ ինքը վաղուց արդեն գրավել է: Հայաստանի ազգային ֆիլհարմոնիկ նվագախումբը` գեղարվեստական ղեկավար և դիրիժոր Էդուարդ Թոփչյանի ղեկավարությամբ, հայ օպերային ու էստրադային երգիչներն այսօր Ազնավուր երգեցին: Յուրաքանչյուրն իր մեկնաբանությամբ ու իր զգացողություններով` հանդիսատեսին էլ տեղափոխելով Շառլի աշխարհ: Համերգի կազմակերպիչները աշխատանք էին տարել նաև Փարիզում, և այս գործում մեծ դեր ունեին Վարդան և Հայկ Պետրոսյանները: Համերգը վարում էր Հայկ Պետրոսյանը, որ մեկ տեղափոխվում էր Փարիզ` Մոնմարտր, Փարիզի Աստվածամոր տաճար, Սենայի կամուրջներն ու փարիզյան գողտրիկ սրճարաններ, մեկ այնտեղից թռչում բեմ` որպես Ազնավուրի երգերի լավագույն կատարողներից մեկը: Փարիզից տեսաուղերձներ էին հղում աշխարհահռչակ երաժիշտներ` նվագում, երգում ու կարդում Ազնավուր: Փարիզից երաժշտական կատարմամբ հանդես եկավ նաև Վարդան Պետրոսյանը` որդու` Հայկ Պետրոսյանի ու ընկերների նվագակցությամբ` մեկ անգամ ևս հիշեցնելով, որ Ազնավուրն առաջին անգամ շանսոնը մատուցեց ջազի միահյուսմամբ: Դահլիճում ամեն մի հաջող ելույթից հետո ժողովուրդը շրջվում էր դեպի օթյակում նստած Ազնավուրը` տեսնելու նրա արձագանքը, իսկ շանսոնյեն անդադար ծափահարում էր: Հայկ Պետրոսյանն ընթերցեց նաև Շառլ Ազնավուրի կենսագրական գրքից այն հատվածը, որտեղ նա իր հաջողությունը կապում է համառության հետ, քանզի, ըստ իրեն, ոչ առանձնապես տեսք է ունեցել, ոչ էլ հզոր ձայն: Բազում փակ դռներ է տեսել, կատակի տակ թաքնված չարախոսություն, արհամարհանք, բայց համառության շնորհիվ գրավել է աշխարհը: Հայկ Պետրոսյանը Շառլի հաջողությունը նաև կապում է իր մեջ ամփոփված սիրո հետ, որ մի ամբողջ աշխարհի սերն է, որով գրավել է իր երազանքի Փարիզը: Գրավեք ձեր երազանքի Փարիզը` ամեն գնով:
Հասմիկ Բուդաղյան
Հ. Գ. Համերգից հետո, արդեն դրսում, ժողովուրդը ծափահարություններով ուղեկցեց Շառլ Ազնավուրին` մինչև մեքենա: Օդում հեռախոսների տարափ էր, բոլորը նկարում էին իրենց Շառլին:
[caption id="attachment_1547480" align="alignright" width="800"]
[/caption]
