Գնացել էի, որ փողը տան, բերեմ տամ Իշխան Բարսեղյանին. վկա (տեսանյութ)
Կաշառք ստանալու մեջ մեղադրվող Իշխան Բարսեղյանի գործով դատական նիստին այսօր շարունակվեց վկա Նորիկ Հակոբյանի հարցաքննությունը: Ըստ մեղադրական եզրակացության` հենց նրա օգտին գործողություններ կատարելու համար է դատավորը միջնորդի միջոցով պահանջել եւ անձամբ ստացել է խոշոր չափերով՝1000 ԱՄՆ դոլար կաշառք: Պաշտպանական կողմը փորձում էր վկայից պարզել, թե ինչի համար է Իշխան Բարսեղյանը գումարը պահանջել՝ հայցը բավարարելո՞ւ, թե՞ հակընդդեմ հայցը վարույթ ընդունելու համար: «Այսինքն՝ դուք առանց ակնկալիքներ ունենալու, առանց հասկանալու, թե ինչ են պատրաստ ձեզ համար անել, միանգամից սպասում էիք, որ ձեզ գումար ասեին, դուք էլ դիմեի՞ք ԱԱԾ»,- դատարանում վկայից հարցրեց պաշտպան Կարեն Ղազարյանը: Ըստ վկայի՝ փաստաբան, գործով ամբաստանյալ Էլզա Զաքարյանից ինքը պարզել է, թե երբ է գումարը տալու դատավորին և միանգամից դիմել է ԱԱԾ: «Գնացել էի, որ փողը տան, բերեմ տամ Իշխան Բարսեղյանին»,- դատարանում հայտարարեց վկա Նորիկ Հակոբյանը՝ նշելով, որ նպատակ չի ունեցել Իշխան Բարսեղյանին «նստացնելու»: Եթե դատարանը հաստատի մեղադրանքը, Իշխան Բարսեղյանին սպառնում է ազատազրկում՝ յոթից տասներկու տարի ժամկետով՝ գույքի բռնագրավմամբ կամ առանց դրա: Այսօրվա դատական նիստը ընթանում էր Շենգավիթի ապակեպատ դահլիճում: Դահլիճում ներկաները հազիվ էին գուշակում, թե ինչ էր խոսվում ապակիներից այն կողմ: Միայն ձայնագրություններից հնարավոր եղավ ինչ-որ չափով հասկանալ:
