Ազատագրում և անկախություն. Զարուհի Փոստանջյանը Ապարանում (տեսանյութ)
Սիրելի հայրենակիցներ,
1918 թվականի մայիսի 28-ին Հայաստանի Առաջին Հանրապետության հռչակմամբ հայ ժողովուրդն ազդարարեց ողջ աշխարհին, որ իրեն չեն կոտրել Հայրենի բնօրրանում մարդկության աչքի առջեւ տեղի ունեցած արհավիրքները` Ցեղասպանությունն ու Հայրենազրկումը, միլիոնավոր զավակների սպանությունն ու տարագրումը, համաշխարհային քաղաքակրթության արժեքներից հայկական գանձանակի մեծամասամբ ոչնչացումը:
Մայիսյան գոյամարտերում հայ ժողովրդի հերոս զավակները` կին եւ այր, տարեց եւ մանուկ, իրենց մտքի ու ոգու, կամքի ու բազկի միասնությամբ կասեցրին թուրքական պետության նախաձեռնած նոր ոճրագործությունը: Հայ ժողովրդի հերոս զավակները` կանայք ու տղամարդիկ, ԱԶԱՏԱԳՐՎԵԼՈՎ վախից, օտարասիրությունից եւ պատրանքներից, կերտեցին հաղթանակներ, որոնց շնորհիվ ուղիղ 99 տարի առաջ նորից վերածնվեց մեր ԱՆԿԱԽ պետականությունը` Հայաստանի Հանրապետությունը:
«Երկիր Ծիրանի» կուսակցությունը Հայաստանի Առաջին Հանրապետության անկախության հռչակման 99-րդ տարեդարձի եւ մայիսյան հաղթամարտերի կապակցությամբ շնորհավորում է բովանդակ հայ ժողովրդին եւ մաղթում, որ 100-ամյա եւ Արցախյան շարժման 30-րդ տարեդարձերը նշենք քաղաքացիական ու քաղաքական ԱԶԱՏԱԳՐՄԱՄԲ` ԱՆԿԱԽ Հայկական պետականության 42 հազար քառակուսի կիլոմետր տարածքում` միասնաբար աշխարհասփյուռ հայության հետ հայացք ունենալով ԴԵՊԻ ԷՐԳԻՐ ՈՒ ԱՐԱՐԱՏ:
«Բաշ-Ապարանից»`
«Երկիր Ծիրանի» կուսակցության լրատվական ծառայություն
28.05.2017թ.
Երեւան
