Պատմություն իմանալու համար պետք է զարգացնել մշակութային տուրիզմը. դեսպան (տեսանյութ)
Բուլղարացիները Երեւանում նշեցին սլավոնական այբուբենի՝ կիրիլիցայի տոնը։ Հայաստանում Բուլղարիայի դեսպանատունը միջոցառումը կազմակերպել էր Պեյո Յավորովի անվան թիվ 131 դպրոցի հետ։ Բուլղարացի գրողի անունը կրող դպրոցը դարձել է երկու երկրներին կապող բարեկամության յուրատիպ կամուրջ։ ՀՀ-ում Բուլղարիայի արտակարգ և լիազոր դեսպան Մարիա Պավլովայի խոսքով, սա առանձնահատուկ տոն է բուլղարացիների համար, հատկապես, որ գիրը դարձավ ազգային ինքնության կարևոր պայման։ «Ընդհանուր շատ բան ունեն հայ և բուլղար ժողովուրդները։ Հիանալի հարաբերություններ։ Մեծ և հարգված համայնք ունեք Բուլղարիայում։ Նաև շատ հայեր սիրով գալիս են իրենց հանգիստը մեզ մոտ անցկացնելու, սակայն կարծում եմ, որ կարևոր է զարգացնել մշակութային տուրիզմը», -ասում է դեսպանը։ Դպրոցի տնօրեն Գրիգոր Սաֆարյանը պարգևատրվեց Բուլղարիայի հանրապետության նախագահի ոսկե մեդալով։ Ի դեպ, ներկաներին հիացրեց դպրոցի ուսուցիչներից կազմված երգչախումբը։
