Դատարանը մերժել է ոստիկանության հայցն ընդդեմ Վազգեն Մանուկյանի
Վարչական դատարանն այսօր մերժել է ոստիկանության հայցն ընդդեմ ակտիվիստ Վազգեն Մանուկյանի: Մոտ երկու տարի առաջ՝ 12.09.2015թ, նա բերման էր ենթարկվել Բաղրամյան պողոտայում իրականացվող էլեկտրաէներգիայի թանկացման դեմ ուղղված խաղաղ հավաքին մասնակցելու համար: Ոստիկանությունը դիմել է ՀՀ վարչական դատարան՝ Վազգեն Մանուկյանին 50.000 դրամի վարչական պատասխանատվության ենթարկելու պահանջով: Այս մասին «Ա1+»-ին հայտնեց նրա պաշտպան Արա Ղարագյոզյանը: Նույն վճռով բավարարվել է Վազգեն Մանուկյանի ներկայացուցիչ, «Ընդդեմ իրավական կամայականության» ՀԿ փաստաբան Արա Ղարագյոզյանի հակընդդեմ հայցը։ «Վճռով դատարանը ոչ իրավաչափ է ճանաչել ոստիկանության ծառայողների գործողությունները, որոնք դրսեւորվել են Վազգեն Մանուկյանի ազատ տեղաշարժվելու, անձնական ազատության և իրավունքների խախտմամբ,խոսքի ազատության, հավաքների ազատության մասով»,- ավելացրեց Արա Ղարագյոզյանը: Նրա խոսքերով՝ որեւէ հիմք չկար, ոստիկանության հայցը բավարարելու, այս տարիների ընթացքում շատ անարդար որոշումներ է ստացել: «Սա հույս էր, որ ի վերջո Հայաստանում կան դատավորներ, ովքեր արդարադատություն են իրականացնում»,- եզրափակեց Արա Ղարագյոզյանը: