Իրանի նախագահի ընտրությամբ ՀՀ հարաբերություններում ոչինչ չի փոխվի (տեսանյութ)
Իրանում նախագահի աթոռի համար հիմնականում կպայքարեն երկու ճամբարի ներկայացուցիչները՝ բարեփոխիչների առաջնորդ, գործող նախագահ Հասան Ռոհանիի եւ պահպանողական Էբրահիմ Ռաիսիի. կարծում է իրանագետ Վարդան Ոսկանյանը եւ հավելում, որ այդ երկրում դեռ չեն կողմնորոշվում, թե ով է ֆավորիտը. «Սոցհարցումների արդյունքում նրանց հնարավորությունները գրեթե հավասար են: Բայց իրանցի ընտրողը չափազանց անկանխատեսելի է, եւ հաճախ է փոխում իր որոշումը: Այնպես որ, ամեն ինչ վճռվելու է հենց ընտրության օրը՝ քվեատուփերի կողքին»: Խոսելով հայ- իրանական հարաբերությունների մասին՝ իրանագետը նշեց, արտաքին քաղաքական ուղեգիծը Իրանում վճռում է ոչ թե նախագահը, այլ գերագույն հոգևոր առաջնորդը՝ այս պահի դրությամբ Ալի Խամենեին: Դա նշանակում է, որ նախագահի ընտրությամբ ոչինչ հարաբերություններում չի փոխվի: Հայ –իրանական տնտեսական կապին անդրադառնալով՝ իրանագետը նշեց, որ այս պահին սպասողական վիճակ է. «Պատժամիջոցներից հետո ունեցել ենք զգալի ձեռքբերումներ ու բացթողումներ: Գլխավոր ձեռքբերումը երրորդ բարձրավոլտ էլեկտրակայանի կառուցումն է: Իսկ կարեւոր բացթողումը կոմունիկացիոն խնդիրն է Հայաստանի եւ Իրանի միջեւ: Խոսքը երկաթուղու կառուցման եւ Հյուսիս-հարավ ավտոմայրուղու մասին է, որոնք ոչ մի կերպ դեռ ի կատար չեն ածվում»: