Լենդուտա՝ Գյումրիում (տեսանյութ)
Հուլիսի 29-ին Գյումրիի կենտրոնում կանցկացվի «Լենդուտա» անունը կրող փառատոնը: «Փառատոնը արհեստներին եւ արվեստներին է վերաբերում»,- այսօր լրագրողների հետ հանդիպման ժամանակ ասաց Գյումրիի «Berlin Art Hotel»-ի տնօրեն Ալեքսանդր Տեր- Մինասյանը: Նա պարզաբանեց, թե ինչու են փառատոնի անունը որոշել դնել «Լենդուտա»: Նկարիչ Արարատ Սարգսյանը Գյումրուն նվիրված ցուցահանդես է կազմակերպել եւ անունը դրել Լենդուտա՝ ոգեշնչված Վենետիկից: (Քաղաքային բնանկարի ժանրը Վենետիկում է ծնվել, կոչվել է վեդուտա, Գյումրու՝ Լենինականի դեպքում՝ Լենդուտա): Ալեքսանդր Տեր- Մինասյանը նշեց, որ մարդկանց մոտ կա այն կարծիքը, թե հուլիսին չարժե Հայաստան գալ, որովհետեւ բավականին շոգ է: Մինչդեռ Գյումրիում, նրա խոսքերով, ամռան այդ ամսին կարելի է հանգիստ քնել եւ գիշերվա մինչեւ ժամը 3-ը նստել դրսում ու առանց հովացուցիչների քնել: Փառատոնի ժամանակ կլինեն տաղավարներ, որտեղ գյումրեցիները կցուցադրեն իրենց գործերը: Պետությունը փառատոնի անցկացման համար հատկացնելու է 1,5 մլն դրամ, մնացած գումարը պետք է ճարեն կազմակերպիչները:
