«Դխկդխկում էինք». Զբոսաշրջիկը քիչ էր մնում նախարարի մոտ գնար (տեսանյութ)
Անգլիացի Պոլ Նութալը մաքրում է մոտոցիկլետը վաղվա ճամփորդությունից առաջ։ Երեւանը հերթական կանգառն է 19 ճանապարհորդի համար, որոնք Մեծ Բրիտանիայից հասնելու են Հեռավոր Արեւելք։ Խմբում բոլորը անգլիացիներ չեն, պարզապես Լոնդոնը դարձել է այն կետը, որտեղ հավաքվել են ճամփորդության այս տեսակի սիրահարները։ Ամենատարեցը 74-ամյա կանադացի է, կան բայքերներ ԱՄՆ-ից, Ֆրանսիայից, Շվեյցարիայից։ Վերջնակետն էլ տարբեր է լինելու.մի մասը հասնելու է Պեկին, մյուս մասը՝ Տոկիո։ Պոլ Նութալի եւ նրա կնոջ համար ճամփորդությունն ավարտվելու է Ղազախստանում։ Նրանց վեցշաբաթյա արձակուրդն արդեն կիսվել է։ Ճանապարհորդները պրոֆեսիոնալ բայքերներ չեն։ «Մի տեղից մյուս տեղը հասնելն է միավորում մեզ։ Սա հոբբի է»,- ասում է նա։ Հայաստան մտնելուն պես Նութալը սկսել է կասկածել իր, ինչպես նաեւ կնոջ մոտոցիկլետի ամրությանը, կհաղթահարեն արդյո՞ք ճանապարհի փոսերը։ «Դուք ունե՞ք ճանապարհ. սարսափելի էր։ Դխկդխկում էինք ... Ուղիղ ուզում էինք գնալ Տրանսպորտի նախարարություն.... Դե, իհարկե, կատակ է, չգնացինք»,-Ճանապարհների վերաբերյալ հարցին այսպես է պատասխանում նա։ Առաջին անգամ Հայաստանում գտնվողի տպավորությունները հակասական են։ Իր բառերով՝ Հայաստանի հյուսիսի աղքատությունն ու Երեւանի թանկությունը չեն համապատախանում իրար։ Ինչպե՞ս է դա հնարավոր։ Երկու օրում հասցրել են լինել Երեւանի տեսարժան վայրերում, հույս ունեն մինչեւ սահման հասնելը փոքր-ինչ էլ ծանոթանալ Հայաստանին։ «Բայց մենք չկարողացանք հասկանալ՝ որն է Հայաստանը, իրական Հայաստանը, հայկական ուտեստները։ Երեւանի կենտրոնը կարծես Իտալիան լինի։ Պիցա , պաստա, սպագետի...»,- բացատրում է նա։ Վերջնակետին հասնելու համար ճանապարհորդները Վրաստանից պետք է անցնեն Ադրբեջան։ Հուսով են,որ այնտեղ խնդիրներ չեն ունենա՝ Հայաստանում լինելու պատճառով։ Բայց դե բոլոր դեպքերում, ինչպես կես կատակ-կես լուրջ ասում է Պոլ Նութալը, մինչ ճանապարհորդության ավարտը մոտոցիկլետի վրա չեն փակցնի Հայաստանը խորհրդանշող պիտակը։
