«Մենք ոչ թե դատապարտյալ ենք, այլ՝ գերի». Վոլոդյա Ավետիսյան (տեսանյութ)
6 տարվա ազատազրկման դատապարտված պահեստազորի գնդապետ Վոլոդյա Ավետիսյանը եւ պաշտպանը դիմում են ներկայացրել պայմանական վաղաժամկետ ազատ արձակելու պահանջով։ «Միակ մարմինը մեր երկրում դատարանն է, որը քիչ թե շատ հիմնավորված որոշում կարող է կայացնել»,- Էրեբունի եւ Նուբարաշեն վարչական շրջանների ընդհանուր իրավասության դատարանում հայտարարեց պաշտպան Արաքս Մելքոնյանը: 6 անգամ անկախ հանձնաժողովը առանց հիմնավորման մերժել է Վոլոդյա Ավետիսյանին, թեեւ ՔԿՀ-ն նրան տվել է դրական բնութագիր. « Ըստ ՔԿՀ-ի՝ նա պատիժը կրելու կարիք այլեւս չունի: Ինչու ենք մենք առանց նպատակի, առանց իմաստի, անձին պահում անազատության մեջ, եթե կարիքն այլեւս չկա: Հետեւաբար անձը, դատապարտյալը , եւ թեկուզ իմ վստահորդը չեն հասկանում՝ ինչու անկախ հանձնաժողովը իրենց հավանություն չտվեց: Սա ոչ թե հայեցողություն է պետության կողմից, այլ կամայականություն է»,- նշեց պաշտպանը: Իսկ Վոլոդյա Ավետիսյանը ավելացրեց. «Այն օրվանից, երբ մեզ ներկայացնում են վաղաժամկետ ազատ արձակման եւ մեզ մերժում են, ես համարում եմ, որ մենք ոչ թե դատապարտյալ ենք, այլ գերի ենք»: Գործով դատախազ Գարեգին Իսախանյանը առաջարկեց լսել անկախ հանձնաժողովի անդամին: Սակայն վերջինս նիստին առանց լիազորագրի էր ներկայացել եւ հեռացավ դահլիճից ։ Դատավոր Արտուշ Գաբրիելյանը ցանկացավ դատական նիստը հետաձգել, սակայն պաշտպանական կողմը առարկեց՝ նշելով, որ իրենց հայցադիմումը անկախ հանձնաժողովի դեմ չէ: Գործով դատական նիստը կշարունակվի ապրիլի 14-ին: Ի դեպ, Վոլոդյա Ավետիսյանը ազատ կարձակվի մայիսին՝ 2013 թ կիրառված համաներման արդյունքում։
