«Աղքատ ժողովուրդը արդար ընտրության ունակ չէ» (տեսանյութ)
Ապրիլի 2-ի խորհրդարանական ընտրություններին ստացված արդյունքը չի բավարարում կոմունիստներին, նույնիսկ տարակուսանքի տեղիք տալիս: Նախնական արդյունքներով ՝ նրանք ստացել են 0,75% ձայն: «Բնակչության հետ հանդիպումներն էին մեզ համոզում նրանում, որ մեր նկատմամբ կա հավատի վերադարձ: Այն, որ ծանր է սոցիալ-տնտեսական վիճակը, այն որ ժողովուրդը ցանկանում է փոփոխություններ տեսնել: Այդ փոփոխությունների գլխավոր դերակատարը տեսնում էր մեզ: Բայց շատ-շատերը իրենց ձայնը չկարողացան պահել եւ վաճառեցին, ոչ մեկը չի թաքցնում, այդպիսի աննախադեպ իրողություն դժվար էր կանխատեսել»,- «Ա1+»-ին ասաց Հայաստանի Առաջադիմական Միացյալ կոմունիստական կուսակցության նախագահ Վազգեն Սաֆարյանը: Նա նշում է, որ պետք է վերացնել տարածքային ընտրակարգով ընտրությունը եւ անցկացնել միայն համամասնական ընտրություններ. «Աղքատ ժողովուրդը արդար ընտրության ունակ չէ»: Հայաստանի Առաջադիմական Միացյալ կոմունիստական կուսակցությունը չի մասնակցելու Երեւանի ավագանու մայիսի 14-ի ընտրություններին. «Երեւանում ստացած մեր ձայների քանակությունը բավարար չէ, որ հիմա էլ փորձենք: Ժամանակն է շատ կարճ, չենք հասցնի: Ռեսուրսների առումով սակավ է, մեր ունեցած աղքատիկ ռեսուրսները մենք ծախսել ենք այս ընտրությունների վրա: Հիմա նորից գնալ ընտրությունների եւ փորձել ինչ- որ բան ապացուցել, դժվար կլինի»: Չմտնելով խորհրդարան՝ հայաստանցի կոմունիստները չեն պատրաստվում հրաժարվել պայքարից։ Նրանք փորձելու են ազդել խորհրդարանում ընդունվելիք օրենքների վրա։