Կոնգրես-ՀԺԿ դաշինքը միանում է ԵԼՔ-ի պահանջին (տեսանյութ)
23.15 ՀՀ կենտրոնական ընտրական հանձնաժողովը քիչ առաջ վերսկսեց արտահերթ նիստը, որը ընդհատվել էր մեկ ժամ առաջ:
ԵԼՔ դաշինքի ներկայացուցիչ Նիկոլայ Բաղդասարյանը առաջարկեց ԿԸՀ հրավիրել մանկապարտեզների եւ դպրոցների տնօրեններին, որպեսի լսեն նրանց բացատրությունները կամ հանձնաժողովի նիստը հետաձգել մինչեւ վաղը ժամը 10:00-ն, որպեսզի դաշինքի ներկայացուցիչները ծանոթանան այդ անձանց՝ ԿԸՀ-ին տրամադրած բացատրությունները:
ԿԸՀ նախագահ Տիգրան Մուկուչյանը երկու հարցն էլ դրեց քվեարկության եւ մերժվեց:
Հանձնաժողովը որոշեց արտահերթ նիստը հետաձգել մինչեւ 0 ժամ 30 րոպեն:
ԿԸՀ-ում է նաեւ Կոնգրես-ՀԺԿ դաշինքի ներկայացուցիչը, որը ցանկանում է միանալ «Ելք»-ի դիմումին:
.......................
Այս պահին ԿԸՀ-ում քննարկվում է «Ելք» դաշինքի դիմումը՝ ՀՀԿ-ի գրանցումը չեղյալ անելու պահանջով։ Պատգամավորի թեկնածուներ Նիկոլայ Բաղդասարյանը եւ Արտակ Զեյնալյանը դիմել են ԿԸՀ՝ որպես հիմք նշելով դպրոցների տնօրենների ձայնագրությունները:
Իսկ ԿԸՀ-ի դիմաց «Ելք» դաշինքի անդամները հավաք են անցկացնում:
Մինչ այդ «Լուսավոր Հայաստան», «Հանրապետություն» եւ «Քաղաքացիական պայմանագիր» կուսակցություններից ձեւավորված դաշինքի անդամները քայլերթ են անցկացրել Երեւանի Կենտրոնական փողոցներով:
Ցուցակի 3-րդ համարը զբաղեցնող Նիկոլ Փաշինյանը ընտրողներին կոչ է արել գլուխները բարձր եւ դուխով քվեարկել Ելք դաշինքի օգտին: «Քվեարկել եւ չհուսահատվել, որովհետեւ ելք կա»,- բարձրախոսով տեղեկացնում էր Նիկոլ Փաշինյանը:
