Վահան Շիրխանյանի նկատմամբ փորձաքննություն դեռ չի անցկացվում
Պաշտպանության նախկին փոխնախարար Վահան Շիրխանյանի նկատմամբ դատաբժշկական փորձաքննություն դեռ չի անցկացվում: «Նշանակողները շատ լավ պատկերացնում էին, որ այդքան արագ դա չի լինի»,- «Ա1+»-ին ասաց նրա պաշտպան Հայկ Ալումյանը: Մարտի 17-ին կայացած դատական նիստում դատախազ Գեւորգ Սարգսյանը միջնորդել էր դատաբժշկական փորձաքննություն նշանակել եւ պարզել, արդյոք Վահան Շիրխանյանը կարող է մասնակցել դատական նիստերին, թե՝ոչ: Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արմեն Բեկթաշյանն էլ բավարարել էր դատախազի միջնորդությունը: Գործով նիստին ամբաստանյալը չէր մասնակցում: Պաշտպան Հայկ Ալումյանն էլ նշել էր, որ Վահան Շիրխանյանին պատգարակով կամ սայլակով հարկավոր է բերել միայն դատարան, նիստերի դահլիճում նա կկարողանա մասնակցել նիստերին: Նրան հարկավոր է միայն բերել դատարան: