«Սասնա ծռեր» խմբի անդամ Արամ Հակոբյանին գրավը չօգնեց
«Սասնա Ծռեր» խմբի անդամ Արամ Հակոբյանը կշարունակի մնալ կալանքի տակ: Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Մարինե Մելքոնյանը մերժել է պաշտպանական կողմի միջնորդությունը՝ Արամ Հակոբյանի նկատմամբ այլընտրանքային խափանման միջոց կիրառելու վերաբերյալ: Պաշտպանական կողմը ահազանգում է՝ Արամ Հակոբյանի առողջական վիճակի վատթարանում է: Փետրվար ամսին նա ուղեղի կաթվածի նախանշաններով, այն է՝ աջ վերջույթների անկառավարելիություն և խոսակցական ֆունկցիայի խանգարում, տեղափոխվել է «Սուրբ Գրիգոր Լուսավորիչ» ԲԿ, որտեղ ախտորոշվել է ուղեղի արյան շրջանառության խախտում: Պաշտպանի` Դավիթ Գյուրջյանի խոսքերով՝ մեկ օր ներերակային ներարկումներ ստանալով՝ Արամ Հակոբյանը տեղափոխվել է «Դատապարտյալների հիվանդանոց», որտեղ բուժում չի ստացել, այնուհետև, մոտ 6 օր անց՝ տեղափոխվել է «Երևան-Կենտրոն» ՔԿՀ, որտեղ վերջինս ստացել է ներերակային ներարկումների 2 շաբաթվա կուրս: «Ներարկումների կուրսից հետո վիճակը որոշակիորեն լավացել է, սակայն Արամ Հակոբյանի ոչ շարժողական, ոչ՝ խոսակցական ֆունկցիաները լիովին այդպես էլ չեն վերականգնվել, և նա դժվարությամբ է տեղաշարժվում»,- ասաց պաշտպանը: Դավիթ Գյուրջյանը դատարան էր ներկայացրել նաեւ տրամադրել նաեւ Արամ Հակոբյանի բժշկական փաստաթղթերի փաթեթը, ինչպես նաև այն, որ ՔԿՀ-ում Արամ Հակոբյանի նկատմամբ պատշաճ բուժհսկողություն և բուժօգնություն չի տրամադրվում եւ չի էլ կարող իրականացվել, քանի որ նրան չեն ենթարկել անհրաժեշտ հետազոտությունների: Նրա առողջական վիճակի վերաբերյալ լիարժեք տեղեկություններ չկան, ինչը լուրջ ռիսկ է ներկայացնում Արամ Հակոբյանի կյանքի համար: Պաշտպանական կողմը պատրաստում է միջնորդություն Մարդու իրավունքների եվրոպական դատարան դիմելու համար ՝անհապաղ միջոցներ կիրառելու խնդրանքով:
