Միջադեպերը ցանկացած չուզողի կողմից կարող են հրահրվել. ՀՀԿ-ական (տեսանյութ)
ՀՀԿ պատգամավորի թեկնածու Շիրակ Թորոսյանը քարոզարշավի ընթացքը նորմալ է գնահատում: «Այս ընտրություններում քաղաքական ուժերը եւ ռեյտինգային թեկնածուները գնում են դեպի ընտրողը՝ իրականացնելով ռեալ քարոզարշավ եւ փորձում հասնել ամենավերջին ընտրողին անգամ»,-այսօր լրագրողների հետ զրույցում ասաց նա: Իսկ ինչ վերաբերում է դանակահարության եւ կրակոցների միջադեպերին, որը կապվում էր հանրապետականների հետ, ապա պատգամավորի թեկնածուն արձագանքեց, որ այդ միջադեպերը որակական ազդեցություն ունենալ չեն կարող ընտրական գործընթացի վրա, եւ ընդհանրապես բավականին քաղաքակիրթ ընտրական գործընթաց է: «Կարող են հրահրվել եւ թիրախ ընտրել ՀՀԿ-ին: Կարող են հրահրվել ցանկացած մարդու, ցանկացած խմբի կողմից, ցանկացած չուզողի կողմից եւ այդ արհեստական սևեռումներն անընդունելի են»,- ավելացրեց պատգամավորի թեկնածուն: Նա հիշեցրեց, որ ռեյտինգային ընտրակարգը այնպիսին է, որ տվյալ կուսակցության ներսում էլ կարող են հակասություններ լինել եւ դանակահարություններից մեկը հանրապետական կուսակցության ռեյտինգային թեկնածուների թիմերի մեջ էր տեղի ունեցել: Դատելով կուսակցության ներկայացրած ցուցակներից եւ գաղափարական բարձր որակից՝ պատգամավորի թեկնածուն հույս հայտնեց, որ նոր խորհրդարանը բովանդակային առումով եւ իր կազմով ավելի լավը կլինի, քան ցանկացած խորհրդարան:
