Ուսը կոտրած կին. «Ոստիկանների ոտքերը լավ եմ հիշում» (տեսանյութ)
Լաուրա Զաքարյանին հիվանդանոց են տեղափոխել մարտի 18-ին՝ ցուցարարների եւ ոստիկանների միջեւ սկսված հրմշտոցից հետո։ Հաց բերողի հիշատակին կազմակերպված բողոքի ակցիայի ժամանակ նա կոտրել է ուսը։
«Ֆիլմերում, որ ցույց են տալիս, այդ կարգի ձեռքները բռնած հու անելով սկսեցին տարբեր ուղղություններով հրմշտոցներ: Ես թիկունքի վրա գնացի»,- «Ա1+»-ին ասաց Լաուրա Զաքարյանը: Թիվ 1 համալսարանական հիվանդանոցում գտնվող կինը ցույց է տալիս իր ձեռնոցները: «Իմ ձեռնոցների վրա կտեսնեք ոտքերի հետքերը, ոստիկանների ոտքերը լավ եմ հիշում, վրայովս անցնելիս»։
Լաուրա Զաքարյանը անձամբ չի ճանաչել Արթուր Սարգսյանին։ 60-ամյա կինը իր պարտքն է համարում մասնակցել քաղաքացիական ակցիաներին։ Չնայած դեռ ցավեր ունի, բայց նաեւ կարծում է՝ իր պարտքն է գնալ եւ վերջին հրաժեշտը տալ Արթուր Սարգսյանին. «Փառք աստծո, իմ ոտքերը շարժվում են, եւ ցավազրկումը ինձ թույլ է տալիս տեղաշարժվել»,- ասաց Լաուրա Զաքարյանը:
Դեպքի առթիվ այսօր հաղորդում է ներկայացվել ՀՔԾ:
Ավելին՝ տեսանյութով
