Ոստիկանները ուժ են կիրառել նաև լրագրողների հանդեպ (տեսանյութ)
21.10 «Հաց բերողի» հիշատակին կազմակերպված Երթի մասնակիցները շարժվեցին Թումանյան փողոցով և այս պահին Ազատության հրապարակում են: Այստեղ էլ կավարտվի բողոքի ակցիան: Հավելենք, որ այստեղ շուրջօրյա նստացույցը կշարունակվի: Շահեն Հարությունյանը հայտարարեց, որ վաղը՝ մարտի 20-ին կրկին կհավաքվեն Ազատության հրապարակում: Ակցիան ավարտվեց 20.24 Ցուցարարները նստացույց կազմակերպեցին Հանրապետության հրապարակում՝ Տիգրան Մեծ պողոտա տանող հատվածում: Ոստիկանները բռնի ուժի կիրառմամբ նստացույց իրականացնողներին հեռացրին այդտեղից: Բռնություն կիրառվեց նաև լրագրողների և օպերատորների նկատմամբ, խոչընդոտվեց նրանց աշխատանքը : Մասնավորապես ոստիկանները արմունկով և բռունցքով սեղմում էին ԶԼՄ աշխատակիցներին: Տեղի ունեցավ նաև հրմշտոց: Այս պահիին ցուցարարները կառավարության շենքի դիմաց են: Այս հատվածը պաշտպանվում է հատուկ հանդերձանք կրող ոստիկանների կողմից: 19.30 Ոստիկանները Ֆրանսիայի հրապարակում նստած ցուցարարներին ստիպեցին հեռանալ այդտեղից: Երթի մասնակիցները վանկարկելով «Արթուրին սպանել են», « Արթուր, Արթուր», «Հաց բերողին սպանել են»՝ քայլում են Մաշտոցի պողոտայով: 19.10 Երթը մեկնարկել է: Ակցիայի մասնակիցների մեջ է երգահան Ռուբեն Հախվերդյանը: Նա ասում է, որ Արթուր Սարգսյանի պատվին պետք է արձան կանգնեցնել: Ազատության հրապարակից դուրս գալուց հետո ցուցարարներից շատերը նստեցին Ֆրանսիայի հրապարակում: Ոստիկանները շրջապատել են նրանց: Նրանք պահանջում են, որ ցուցարարները ազատեն հրապարակը և քայլեն նախօրոք պայմանավորված ուղիով: 18.34 Մեկնարկեց Հաց Բերողի հիշատակին կազմակերպված Բողոքի ակցիան: Շահեն Հարությունյանը հայտարարեց, որ պահանջների ցանկից հանում է երկու հարց՝ 1. Հաց բերողի հուղարկավորությունը Եռաբլուրում 2. Արդարադատության նախարարի հրաժարականը: Իսկ Թամար Հովհաննիսյանը հայտարարեց, որ Արթուր Սարգսյանի հոգեհանգիստը տեղի է ունենալու երեքշաբթի օրը և նա հուղարկավորվելու է Շահումյան գյուղում. այդպես ցանկացել են նրա հարազատները: Արդարադատության նախարարի հրաժարականի հարցն էլ հանվեց, քանի որ ըստ Շահեն Հարությունյանի՝ գլխավոր դատախազն է, որ ապօրինի որոշում է կայացրել Արթուր Սարգսյանին կալանավորելու հարցում: Քիչ անց Ազատության հրապարակից կմեկնարկի երթը: ................ Հաց բերող Արթուր Սարգսյանին սատարողները այսօր ևս բողոքի ակցիա են նախաձեռնել Ազատության հրապարակում: Նրանց գլխավոր պահանջն է իշխանություներին Արթուր Սարգսյանին հուղարկավորել «Եռաբլուր» պանթեոնում: Սպասվում է նաև երթ՝ Երևանի փողոցներով: