Վերջապես հասկացան, որ ոսկու պահուստները պետք է վերականգնել. Հրանտ Բագրատյան (տեսանյութ)
ՀՀ նախկին վարչապետ, «Ազատ դեմոկրատներ-Ազատություն» դաշինքի ներկայացուցիչ Հրանտ Բագրատյանը դրական է գնահատում Հայաստանի համախառն արտաքին պահուստներում ոսկու մասնաբաժնի վերականգնման Կենտրոնական բանկի որոշումը: Մարտի 9-ին կայացած ասուլիսին նա ասաց, որ ԿԲ-ի պահուստներում անպայման ոսկի պետք է լինի, քանի որ ոսկին շատ կայուն փոխարժեք է և միջազգային պահուստների դիվերսիֆիկացման լավագույն տարբերակ, մինչդեռ դոլարը և եվրոն հետզհետե արժեզրկվելու են: Արդյունքում արժեզրկվելու են նաև բոլոր երկրների, այդ թվում նաև՝ Հայաստանի, թիրախային վալյուտաներով պահվող խնայողությունները: «ԿԲ-ում հարյուր տոկոսով հիմար չեն, և բնականաբար տեսնելով, որ սխալ է ունենալ շատ դոլարային պահուստներ, վերջապես հասկացան, որ ոսկու պահուստները անհրաժեշտ է վերականգնել և փորձում են փոխել վիճակը»,- շեշտեց Հ. Բագրատյանը: Նա մեղադրեց ԿԲ նախկին նախագահ Տիգրան Սարգսյանին՝ մակրոտնտեսական հանցագործության մեջ, հավելելով, որ եթե կա երկիր, ուրեմն նա պետք է պատասխանատվություն կրի ՀՀ ոսկու պաշարները 15 տարի առաջ վաճառելու համար: Նշենք, որ 2016թ. հունիսին ԿԲ նախագահ Արթուր Ջավադյանը խորհրդարանում հայտարարեց, որ Հայաստանի ոսկու պահուստները վերականգնվելու են: Այդ նպատակով Հայաստանում ձուլման գործարան է կառուցվում, և 2017 թվականին Հայաստանը կկարողանա ձուլվածք արտադրել: Հայաստանի միջազգային պահուստների 1.4 տոննա ոսկին վաճառվել է 2003 թվականին 17 մլն դոլարով: ԿԲ տվյալներով, 2016 թվականի վերջին ՀՀ միջազգային պահուստները կազմել են 2 200,3 մլն դոլար՝ տարվա ընթացքում աճելով 23,9 տոկոսով: Դրանց կազմում ազատ փոխարկելի արժույթով արտաքին ակտիվները կազմել են 2 196,8 մլն., իսկ փոխառության հատուկ իրավունքների (SDR) չափը ԱՄՀ-ում՝ 3,5 մլն դոլար։
