Վահան Շիրխանյանին հետազոտում են
Նորքում զինված խմբի գործով կալանավորված Պաշտպանության նախկին փոխնախարար Վահան Շիրխանյանը դեռ գտնվում է քաղաքացիական հիվանդանոցում, եւ անընդհատ հետազոտություններ են անցկացվում: «Վերջնական ախտորոշումը մեզ դեռ հայտնի չէ»,- այս մասին «Ա1+»-ին հայտնեց նրա պաշտպան Հայկ Ալումյանը: Պաշտպանական կողմը բավականին երկար ժամանակ էր բարձրաձայնում Վահան Շիրխանյանի առողջական վիճակի վատթարացման մասին, սակայն «Երեւան-Կենտրոն» ՔԿՀ-ում գտնվող պաշտպանության նախկին փոխնախարարը համապատասխան հետազոտություն եւ բուժում չէր ստանում: Վահան Շիրխանյանի առողջության հետ կապված Մարդու իրավունքների եվրոպական դատարանը (ՄԻԵԴ) Հայաստանի կառավարությանը հարցեր է ուղղել, որոնց պատասխանելու համար կառավարությանը մինչեւ փետրվարի 22-ը ժամանակ էր տվել: Պաշտպանը ցավով է նշում, որ Վահան Շիրխանյանին հիվանդանոց տեղափոխելը կապված էր հենց ՄԻԵԴ-ի՝ կառավարությանն ուղղված հարցերի հետ: «Մարդուն բուժելու կամ հետազոտելու համար անհրաժեշտ է, որ ՄԻԵԴ-ը հարցեր ուղղի: Իրենք ոչ լսում են, ոչ տեսնում են: Պետք է Եվրոպական դատարանի միջամտությունը, որ տեսողությունը կամ լսողությունը ադեկվատ դառնա»,- ավելացրեց պաշտպանը: Հայկ Ալումյանի խոսքերով՝ եթե այդ միջամտությունը չլիներ, ապա Վահան Շիրխանյանը կամ տեղափոխված կլիներ «Արմավիր» ՔԿՀ, կամ կշարունակեր մնալ «Երեւան-Կենտրոն» ՔԿՀ խցում: Վահան Շիրխանյանը ողնաշարի հետ կապված խնդիրներ ունի եւ չի կարողանում նույնիսկ ինքնուրույն տեղաշարժվել:
