Խանդոյան. «Դատարանը խախտում է իմ իրավունքները եւ կոպիտ» (տեսանյութ)
Խորենացիի դեպքերով կալանավորված Արարատ Խանդոյանը պատրաստվում է լքել նիստերի դահլիճը, եթե դատարանը սկսի հետազոտել գործում առկա տեսանյութը: «Նախ ինձ հարց չեք ուղղում՝ ես դե՞մ եմ, թե կողմ եմ: Որոշում եք կայացնում, որը ապօրինի է»,- այսօր դատարանում հայտարարեց Արարատ Խանդոյանը: Այսօր դատարան ներկայացած 6 տուժողներին լսելուց հետո դատավոր Մնացական Մարտիրոսյանը որոշում կայացրեց հետազոտել տեսանյութը եւ Արարատ Խանդոյանի հագուստները: Քանի որ տուժող մյուս ոստիկանները չէին ներկայացել դատարան: Գործով անցնում է 46 տուժող ոստիկան: «Դատարանը խախտում է իմ իրավունքները եւ կոպիտ»,- հայտարարեց «Սասնա ծռեր» խմբի անդամ Արայիկ Խանդոյանի եղբայրը՝ Արարատ Խանդոյանը: Նա նշեց, որ բոլոր տուժողներին լսելուց հետո նոր միայն կարող են հետազոտել գործում առկա ապացույցները. «Դատախազությունը փրփուրներից է ձեռքը գցել եւ ուղղորդելու է ոստիկանության աշխատակիցներին»: Մեղադրողն էլ ավելացրեց, որ այդ տեսագրությունները իրենց մոտ վաղուց են եղել եւ որեւէ մեկին ուղղորդելու ցանկություն չունեն: Ոստիկանին հարվածելու եւ վահանը քաշելու մեջ մեղադրվող Արարատ Խանդոյանի պաշտպանն էլ դատարանին մեղադրեց արդար դատաքննություն չիրականացնելու եւ մեղադրանքի կողմ հանդես գալու մեջ: «Սա հերթական անգամ հիմնավորում է, որ իմ պաշտպանյալը քաղաքական բանտարկյալ է: Դուք կատարում եք զուտ քաղաքական պատվեր՝ Բաղրամյան 26-ի պատվերը»,- նշեց Արա Ղարագյոզյանը: Մինչ այդ դատարանում ցուցմունք տվեցին ոստիկանության 6 աշխատակիցներ: Նրանցից եւ որեւէ մեկը չէր տեսել, որ Արարատ Խանդոյանը հարվածել է իրենց: Վաշտի հրամանատարի տեղակալ Գեղամ Արսենյանը նշեց, որ «ուղեղի սալջարդ» է ստացել զանգվածային անկարգություններից հետո եւ մեկ շաբաթ անցկացրել է հիվանդանոցում: Այս պահին դատարանը քննում է պաշտպանական կողմի ներկայացրած ինքնաբացարկի միջնորդությունը: