«Իրոք, իմ առանձնասենյակում Պավլիկ Մանուկյանի հետ միջադեպ եղել է». Սեյրան Օհանյան (տեսանյութ)

«Անսխալական մարդիկ չեն լինում… Իրոք, իմ առանձնասենյակում Պավլիկ Մանուկյանի հետ միջադեպ եղել է, բայց բաժակի մեջ թքելու…, ես նույնիսկ անհարմար եմ զգում, նման բան չի եղել»,- այսօր Օհանյան-Րաֆֆի-Օսկանյան դաշինքի հրավիրած ասուլիսի ժամանակ հայտարարեց ցուցակը գլխավորող՝ Պաշտպանության նախկին նախարար Սեյրան Օհանյանը` պատասխանելով հարցին, թե ճի՞շտ է, որ Սեյրան Օհանյանը 2005-ին Արցախում պաշտոնավարելու ժամանակ Պավլիկ Մանուկյանին ծեծել է իր աշխատասենյակում և թքել նրա բաժակի մեջ:

Սեյրան Օհանյանը նաև վստահեցրեց, թե հետո երկարատև աշխատանք են ունեցել Պավլիկ Մանուկյանի հետ և իրենց հարաբերությունները բավականին բարձր մակարդակի են եղել. «Իմ պաշտոնավարման տարիներին Պավլիկ Մանուկյանի և նրա ընկերների հետ ունեցել եմ լավ հարաբերություններ և փորձել եմ աջակցել բոլոր հարցերով»:

Հարցին, թե ի՞նչ միջոցներով է ձեռք բերել  Վահագնի թաղամասում իր առանձնատունը, Սեյրան Օհանյանը պատասխանեց, թե Վահագնի թաղամասում հողակտոր իրեն 2008-ին նվիրել է անձամբ Վահագն Հովնանյանը, որը հետո վաճառել է և այսօր այդտեղի առանձնատանը բնակվում է վարձով:

Հայաստանում քաղբանտարկյալներ կա՞ն: Հարցին Սեյրան Օհանյանը խուսափողական պատասխան տվեց. «Անկասկած հասկանալի է՝ խորը հակասություն կա իշխանությունների եւ ժողովրդի միջեւ, վստահությունը քրգործերի նկատմամբ մտածելու տեղիք է տալիս: Մենք ժողովրդին չհավատալու իրավունք չունենք» ։

Անդրադառնալով 2008 թվականի մարտի 1-ի ողբերգական իրադարձությունների բացահայտման հարցին՝ Սեյրան Օհանյանն ասաց, որ մարտի 1-ի հարցում համապատասխան աշխատանք կատարել եւ կատարում են ներկայիս իշխանությունները: «Այնտեղ բանակի ներգրավվածությունը կոնկրետ մարտի 1-ին բացակայում է: Եթե մենք գանք իշխանության, մենք անպայման այն ավարտին կհասցնենք»: