«Սասնա ծուռ» Թաթուլ Թամրազյանին դատարան չէին բերել
Վերաքննիչ քրեական դատարանում այսօր նշանակված «Սասնա ծռեր» խմբի անդամ Թաթուլ Թամրազյանին ապօրինի անազատության մեջ պահելու վերաբերյալ դատական նիստը չկայացավ: Նրան չէին բերել դատարան: Հեռախոսազանգով նրա պաշտպան Մոնիկա Մարգարյանին դատարանից հայտնել են, որ հնարավոր չի եղել ապահովել նրա ներկայությունը: Դատավոր Մանուշակ Պետրոսյանի աշխատակազմից նաեւ տեղեկացրել են, որ թեև Թաթուլ Թամրազյանը իր ներկայությունը ապահովելու վերաբերյալ դիմում չի ներկայացրել, սակայն դատավորը ցանկացել է նրա ներկայությունը ապահովել: Իսկ պաշտպանն արդեն երկու շաբաթ է՝ չի կարողանում տեսակցել «Դատապարտյալների հիվանդանոց» ՔԿՀ-ում գտնվող Թաթուլ Թամրազյանին: Առանձնազրույց ունենալուց առաջ փաստաբանին ցանկացել են խուզարկել, ինչին Մոնիկա Մարգարյանը դեմ է եղել: 26-ամյա Թաթուլ Թամրազյանը եւ նրա պաշտպանը բողոքարկում են քննիչի անգործությունը: Նա հուլիսի 17-ից ՊՊԾ գունդը գրավելու ժամանակ վիրավորվել է եւ մինչեւ օգոստոսի 6-ը առանց կարգավիճակի գտնվել «Էրեբունի» բժշկական կենտրոնում: Հարազատներին եւ փաստաբանին թույլ չեն տվել տեսակցել նրան, հեռախոսազրույց ունենալ: