Խանդոյան. «Լապշինի պես ինձ էլ արտահանձնեք Ադրբեջանին, պրծնենք» (տեսանյութ)
«Սասնա ծռեր» խմբի անդամ Արայիկ Խանդոյանի եղբայրը լքեց դատարանի դահլիճը, երբ վկա Հայկ Չախմախչյանը ցուցմունք էր տալիս: Նրա խոսքերով՝ հենց ինքն է Արարատ Խանդոյանին բերման ենթարկել, սակայն այլ մանրամասներ չէր հիշում «Կարող եք ինձ էլ Լապշինի պես արտահանձնեք Ադրբեջանին, պրծնենք»,- մինչ դահլիճից դուրս գալը հայտարարեց Արարատ Խանդոյանը: 10 րոպե ընդմիջումից հետո Արարատ Խանդոյանը հանդես եկավ հայտարարությամբ՝ նշելով, որ իրեն «Մեղեդի» սրճարանից ԱԱԾ-ականներն են բերման ենթարկել, այլ ոչ թե ոստիկան Հայկ Չախմախչյանը. «Տարել են ԱԱԾ դարպասների մոտ, մեզ սպասեցնել են տվել 30 րոպե, 30 րոպեից հետո մեզ տեղափոխել են 6-րդ վարչություն: Չախմախչյանը իր սեփական Մերսեդեսով եկել է եւ դարպասներից ներս չի մտել: Մեզ նստացրել են Չախմախչյանի արծաթագույն Մերսեդեսը եւ տեղափոխել Քանաքեռ-Զեյթունի ոստիկանության բաժին»: Արարատ Խանդոյանը մեղադրվում է հուլիսի 20-ին Խորենացի փողոցում իշխանության ներկայացուցչի նկատմամբ բռնություն գործադրելու մեջ։ Ըստ մեղադրանքի՝ նա քաշել է ոստիկանի վահանը։ Ոստիկանական ցուցմունքները նա համարում է ոչ արժանահավատ։ «Մտածում են, մի աստղ բարձրացնեն, մի աստղ ավել ստանան: Բայց չեն մտածում, մարդու դեմ կեղծ ցուցմունք տալով, մարդուն մեղադրեն այնպիսի հանցանքի մեջ, որը նա չի արել: Դա ուղղակի աբսուրդ է»,- ավելացրեց Արարատ Խանդոյանը: Դատական հաջորդ նիստին ցուցմունք կտան գործով տուժողները՝ 46 ոստիկանները:
