Կապուտիկյանին առաջիններից հնարավորություն տվեցին այցելել Սիրիա, Լիբանան (տեսանյութ)
Քաղաքացիական խիզախություն ու անհանգստություն. հենց այսպես են հիմա հիշում ու բնութագրում Սիլվա Կապուտիկյանին։ Նա այն հեղինակավոր մտավորականներից էր, որի խոսքին մարդիկ սպասում էին, ում լսում էին ամենաբարձր ատյաններում։ «Անցած տարի նշեցինք Անկախության 25-ամյակը, սակայն ես չեմ հիշում, որ ասվեր այն մասին, որ ակունքներում Կապուտիկյանն էր կանգնած իր ստորագրահավաքով իր շահեկան ելույթներով ու հոդվածներով»,- ասաց Գրականության եւ արվեստի թանգարանի տնօրեն, գրող, գրականագետ Կարո Վարդանյանը։ Հունվարի 20-ին լրանում է բանաստեղծուհու ծննդյան 98-ամյակը: Այդ առիթով Կոմիտասի անվան զբոսայգու պանթեոնում բանաստեղծուհու շիրիմին այցելության էին եկել մտավորականներ, քաղաքական գործիչներ, մարդիկ, որոնք ճանաչել են նրան։ Հայաստանի դեմոկրատական կուսակցության նախագահ Արամ Սարգսյանը հիմա էլ հիշում է՝ անգամ խորհրդային ամենադաժան տարիներին նա ոչ միայն պոետ էր, այլեւ ակտիվ քաղաքացի։ «1980-ական թվականների կեսերին, երբ շատ մտահոգված էր հասարակությունը հայկական ատոմակայանի վիճակով, Կապուտիկյանը լսելով գիտնականներին՝ մի խումբ ստեղծեց, որ բավական լուրջ աշխատանք տարան, որպեսզի ատոմակայանի վիճակը փոխվեր։ Ուղիղ 1.5 տարի ատոմակայանը կանգնեց վերանորոգման՝ շնորհիվ այդ խմբի գործողությունների»,-ասաց Արամ Սարգսյանը։ Լիբանանահայ Թորոս Թորանյանը ուսանողական տարիներին հաճախ էր հանդիպում Կապուտիկյանի հետ։ Այն տարիներին թեեւ փակ էին Խորհրդային Միության սահմանները, սակայն հենց Կապուտիկյանին առաջիններից հնարավորություն տվեցին այցելել Սիրիա, Լիբանան. «ժողովուրդը շատ սիրում էր նրան եւ նորածին աղջիկներին սկսեցին Սիլվա կոչել։ Նա մեր լեզուն շատ լավ գիտեր, երբ կխոսեր՝ շատ տրամաբանական կխոսեր»։ Սփյուռքի գաղթավայրերում կատարած շրջագայությունից հետո Կապուտիկյանը գրել է «Քարավանները դեռ քայլում են», «Խճանկար հոգու և քարտեզի գույներից» և այլ ուղեգրություններ: Նա նաեւ մանկական բանաստեղծությունների հեղինակ է: Սակայն նրա ստեղծագործություններում միշտ կենտրոնական տեղ են զբաղեցրել հայրենիքի եւ սիրո թեմաները։