Լեւոն Արոնյանը եւ Հիկարու Նակամուրան կրկնեցին քայլերը
Այսօր տեղի ունեցան Լոնդոնի Chess Classic շախմատի մրցաշարի նախավերջին՝ 8-րդ տուրի պարտիաները: Հայաստանի շախմատի հավաքականի առաջատար Լեւոն Արոնյանը սեւերով մրցեց Հիկարու Նակամուրայի հետ, որը նախորդ տուրում տոնել էր միակ հաղթանակը: Սպիտակներով հանդես եկող ամերիկացի գրոսմայստերն արդեն 9-րդ քայլին առաջարկեց փոխանակել թագուհիները: Լեւոն Արոնյանն ընդունեց այն, իսկ հետո հաշվենկատ քայլերով պարզեցրեց իրավիճակը: Շուտով կողմերը կրկնեցին քայլերը եւ խաղաղ դաշն կնքեցին: Այդպիսով, Լեւոն Արոնյանը վաստակեց 4 միավոր եւ նահանջեց 6-րդ տեղ, քանի որ իրեն համաքայլ ընթացող Վիշվանաթան Անանդն ու Վլադիմիր Կրամնիկն այսօր հաղթանակ տարան եւ կես միավորով առաջ պոկվեցին: Վաղը նախատեսված ավարտական տուրում մեր շախմատիստը սպիտակներով կմրցի մրցաշարի ետնապահ Վեսելին Թոփալովին հետ: Հաղթանակի դեպքում Լեւոն Արոնյանը որոշակի հաշվարկների դեպքում կարող է բաժանել 2-3-րդ տեղերը, քանի որ մրցաշարի միանձնյա առաջատար ամերիկացի Ուեսլի Սոն արդեն անհասանալի է՝ 5,5 միավոր: