«1988-90 թթ-ին ծնված երիտասարդները հատուկ վերաբերմունք են պահանջում». հոգեբան (տեսանյութ)
1988թ-ի դեկտեմբերի 7-ի երկրաշարժը էլ ավելի ծանրացրեց առանց այն էլ Հայաստանում այդ օրերին առկա ծանր իրավիճակը, որ ստեղծվել էր Արցախյան շարժման հետեւանքով: Երկրաշարժը երկրորդ հարվածն էր։ Երրորդ՝ ՀԱԷԿ-ի փակումն էր: Հոգեբան Իրինա Ծատուրյանի խոսքերով, այս ամենը լրջագույն սթրեսի պատճառ էր այդ տարիներին: Ըստ հոգեբանի, երբ իր մոտ երիտասարդ հաճախորդ է գալիս, ապա ինքն առաջինը հարցնում է, թե նա որ թվին է ծնվել: Իրինա Ծատուրյանն ասում է, որ եթե անգամ երիտասարդը ծնվել է Սպիտակի երկրաշարժից տուժած բնակավայրերից հեռու՝ Երեւանում, սակայն 1988-90 թթ-ին, ապա նա դառնում է հատուկ վերաբերմունք պահանջող անձ: Հոգեբանը եկել է մի եզրակացության՝ հայերը սթրեսից սփոփվելու եւ այդ վիճակից դուրս գալու զարմանալի հատկություն ունեն: «Մեր ազգին ոչ մի բան չի հաղթի, մեր գենետիկ հիշողության մեջ ջարդեր կան, ղարաբաղյան պատերազմն իր պատմություններով, հետո երկրաշարժ, հետո ՀԱԷԿ-ի փակում, բայց հիմա մենք էլի նորմալ միմյանց հետ շփվում ենք»: Իրինա Ծատուրյանը նկատել է, որ երկաշարժից հետո շատացել է արտագաղթը, և եթե ոմանք վերադառնում էլ են հայրենիք, ապա հիմնականում ոչ այնտեղ, որտեղ սթրես են տարել: Մարդիկ ունենում են վախեր, դառնում են ոչ սթրեսակայուն, երեխաները ծանր են տանում գերդաստանների փլուզումը: